main wo patthar

us se rishta rahā ajab merā

aa gayā naam be-sabab merā

us se aage ke marhale pe magar

nā-rasā.ī ke silsile pe magar

maiñ to kuchh bol bhī nahīñ saktā

raaz ye khol bhī nahīñ saktā

silsila duur tak udāsī kā

ek manzar hai nā-sipāsī kā

jhuuT ho vaqt ho ki ishq-e-mudām

yaad ho ḳhvāb ho ki hij-e-davām

un ke to paañv bhī nahīñ hote

aur vo chal kar aa.e mere paas

bār-e-ehsāñ bhī mujh pe Daal ga.e

le uḌe chhīn kar vo hosh-o-havās

jaane sab ho ga.e kahāñ rū-posh

haañ vahī jān-e-āsmāñ-bar-dosh

shor hai ḳhitta-e-adāvat meñ

maiñ huuñ phir hujra-e-nadāmat meñ

kho gayā shauq-e-intizār mirā

chhin gayā mujh se merā shahr-e-najāt

kis bayābāñ meñ us ne Daal diyā

ho ga.ī duur shāhrāh-e-hayat

yuuñ ruḳh-e-e'tibār bhī TuuTā

maz.hab-e-iḳhtiyār bhī chhūTā

ishq jab imtihān letā hai

shahr-e-mahbūb chhūT jaatā hai

maiñ vo patthar jo TūTtā bhī nahīñ

sabr-e-ayyūb TuuT jaatā hai

us se rishta raha ajab mera

aa gaya nam be-sabab mera

us se aage ke marhale pe magar

na-rasai ke silsile pe magar

main to kuchh bol bhi nahin sakta

raaz ye khol bhi nahin sakta

silsila dur tak udasi ka

ek manzar hai na-sipasi ka

jhuT ho waqt ho ki ishq-e-mudam

yaad ho KHwab ho ki hij-e-dawam

un ke to panw bhi nahin hote

aur wo chal kar aae mere pas

bar-e-ehsan bhi mujh pe Dal gae

le uDe chhin kar wo hosh-o-hawas

jaane sab ho gae kahan ru-posh

han wahi jaan-e-asman-bar-dosh

shor hai KHitta-e-adawat mein

main hun phir hujra-e-nadamat mein

kho gaya shauq-e-intizar mera

chhin gaya mujh se mera shahr-e-najat

kis bayaban mein us ne Dal diya

ho gai dur shahrah-e-hayat

yun ruKH-e-e'tibar bhi TuTa

mazhab-e-iKHtiyar bhi chhuTa

ishq jab imtihan leta hai

shahr-e-mahbub chhuT jata hai

main wo patthar jo TuTta bhi nahin

sabr-e-ayyub TuT jata hai