main zer-e-lab apna shajra-e-nasab dohra raha tha

chhaTī baar

vo dajla-o-furāt ke darmiyān

mīnāra-e-bābul ke saa.e meñ

mujh par munkashif hoī

vo muqaddas mīnār kī sātvīñ manzil par baiThī

āyat-dar-āyat bikhre sitāroñ kī

tilāvat par māmūr thī

vo ashtār ke ma.abad ke shumāl meñ saa.e bāñTte

bāġhāt-e-mua.llaqā ko

bār-āvarī kī duā dene aa.ī thī

us kā be-niyāz jism

un hāthoñ kī nā-rasā.ī ko pahchāntā thā

jo use chhūne kī tamannā meñ

zer-e-qabā jal rahe the

maiñ ne do lashkaroñ ke darmiyān

apne daadā ke rajaz meñ kalām kiyā

jis kī muTThī meñ qabīle kī aabrū thī

mere aqab meñ hare jismoñ vaalī aurteñ

āsmānī daf kī lai par

maut kā tarāna gaane lagīñ

merā najībut-tarafain ghoḌā

jis kā shajara

merī uñgliyoñ kī poroñ par raqam thā

aur jise maiñ apnī aulād se bhī aziiz jāntā thā

maiñ ne us kī ziin meñ baiThne se inkār kiyā

aur havā par paañv rakhtā huā

dushman ke qalb-e-lashkar tak jā pahuñchā

mujhe dekh kar

sūrmāoñ kī āñkheñ

naaf tak phail ga.iiñ

maiñ zer-e-lab

apnā shajra-e-nasab dohrā rahā thā

maiñ ne apne paañv meñ bhāgte ḳhuun ko

mahmez dī

aur apnī zahr meñ bujhī talvār

maidān-e-jañg ke darmiyān gaaḌ dī

jis ke murassā daste par

zaitūn kā akhuva phuuT paḌā

maiñ apnī guzishta zindagī par

kaf-e-afsos malne lagā

chhaTi bar

wo dajla-o-furaat ke darmiyan

minara-e-babul ke sae mein

mujh par munkashif hoi

wo muqaddas minar ki satwin manzil par baiThi

aayat-dar-ayat bikhre sitaron ki

tilawat par mamur thi

wo ashtar ke mabad ke shumal mein sae banTte

baghat-e-muallaqa ko

bar-awari ki dua dene aai thi

us ka be-niyaz jism

un hathon ki na-rasai ko pahchanta tha

jo use chhune ki tamanna mein

zer-e-qaba jal rahe the

main ne do lashkaron ke darmiyan

apne dada ke rajaz mein kalam kiya

jis ki muTThi mein qabile ki aabru thi

mere aqab mein hare jismon wali aurten

aasmani daf ki lai par

maut ka tarana gane lagin

mera najibut-tarafain ghoDa

jis ka shajara

meri ungliyon ki poron par raqam tha

aur jise main apni aulad se bhi aziz jaanta tha

main ne us ki zin mein baiThne se inkar kiya

aur hawa par panw rakhta hua

dushman ke qalb-e-lashkar tak ja pahuncha

mujhe dekh kar

surmaon ki aankhen

naf tak phail gain

main zer-e-lab

apna shajra-e-nasab dohra raha tha

main ne apne panw mein bhagte KHun ko

mahmez di

aur apni zahr mein bujhi talwar

maidan-e-jang ke darmiyan gaD di

jis ke murassa daste par

zaitun ka akhuwa phuT paDa

main apni guzishta zindagi par

kaf-e-afsos malne laga