majaz ki maut par

ai be-niyāz-e-shuq-e-farāvāñ kahāñ hai tū

ai nig.hat-e-shamīm-e-bahārāñ kahāñ hai tū

ai bā.is-e-faroġh-e-gulistāñ kahāñ hai tū

ai raunaq-e-vajūd-e-ḳhayābāñ kahāñ hai tū

pathrā ga.ī haiñ āñkheñ tire intizār meñ

kuchh to batā ki ai mah-e-tābāñ kahāñ hai tū

vo tere shauq-e-naġhma-sarā.ī ko kyā huā

ai yaar naġhma-rez-o-ġhazal-ḳhvāñ kahāñ hai tū

tere baġhair kuchh nahīñ lutf-e-sharāb-o-sher

ai nig.hat-e-latīf-e-ḳhayābāñ kahāñ hai tū

haañ tere dam se raunaq-e-bazm-e-vajūd thī

ai raushnī-e-sham-e-farozāñ kahāñ hai tū

tere baġhair ḳhāk-basar phir rahā huuñ maiñ

mere baġhair sar-ba-garebāñ kahāñ hai tū

ai be-niyaz-e-shuq-e-farawan kahan hai tu

ai nighat-e-shamim-e-bahaaran kahan hai tu

ai bais-e-farogh-e-gulistan kahan hai tu

ai raunaq-e-wajud-e-KHayaban kahan hai tu

pathra gai hain aankhen tere intizar mein

kuchh to bata ki ai mah-e-taban kahan hai tu

wo tere shauq-e-naghma-sarai ko kya hua

ai yar naghma-rez-o-ghazal-KHwan kahan hai tu

tere baghair kuchh nahin lutf-e-sharab-o-sher

ai nighat-e-latif-e-KHayaban kahan hai tu

han tere dam se raunaq-e-bazm-e-wajud thi

ai raushni-e-sham-e-farozan kahan hai tu

tere baghair KHak-basar phir raha hun main

mere baghair sar-ba-gareban kahan hai tu