maKHdum marhum

ab vo āvāz nahīñ aa.egī

jis ke har loch meñ añgḌā.ī thī

jis ke har bol meñ shahnā.ī thī

dard thā jis meñ mohabbat thī fusūñ-kārī thī

har rag-e-mulk meñ jo saarī thī

zindagī us ko kahāñ pā.egī

ab vo āvāz nahīñ aa.egī

kabhī ik mard-e-siyāsat vo kabhī ik shā.ir

naġhma-e-zīst sunātā hī rahā

parcham-e-ishq uḌātā hī rahā

ek sho.ala thā ki har bazm kā sayyāra thā

nuur hī nuur

dard ke shahr meñ āvāra thā

kabhī ḳhud ek shikārī vo kabhī ik taa.ir

kabhī ik mard-e-siyāsat vo kabhī ik shā.ir

bharī barsāt se khelā barsoñ

marmarīñ jism kabhī chāñdī raat

husn kī baat thī us kī har baat

qissa-e-bhāg-matī soz se ma.amūr kiyā

soz hī soz

sāz-o-āhañg se mas.hūr kiyā

dard ko jaan pe jhelā barsoñ

bharī barsāt se khelā barsoñ

ḳhidmat-e-ahl-e-vatan kar ke banā thā maḳhdūm

us kī har lai pe sitāre raqsāñ

Hyderabad ke pyāre raqsāñ

mard-e-āhan thā aqīde kā jo pāband rahā

jañg hī jañg

jañg-jū ho ke bhī ḳhursand rahā

haa.e afsos ki hai ab vo mujāhid marhūm

ḳhidmat-e-ahl-e-vatan kar ke banā thā maḳhdūm

ab wo aawaz nahin aaegi

jis ke har loch mein angDai thi

jis ke har bol mein shahnai thi

dard tha jis mein mohabbat thi fusun-kari thi

har rag-e-mulk mein jo sari thi

zindagi us ko kahan paegi

ab wo aawaz nahin aaegi

kabhi ek mard-e-siyasat wo kabhi ek shair

naghma-e-zist sunata hi raha

parcham-e-ishq uData hi raha

ek shoala tha ki har bazm ka sayyara tha

nur hi nur

dard ke shahr mein aawara tha

kabhi KHud ek shikari wo kabhi ek tair

kabhi ek mard-e-siyasat wo kabhi ek shair

bhari barsat se khela barson

marmarin jism kabhi chandi raat

husn ki baat thi us ki har baat

qissa-e-bhag-mati soz se mamur kiya

soz hi soz

saz-o-ahang se mashur kiya

dard ko jaan pe jhela barson

bhari barsat se khela barson

KHidmat-e-ahl-e-watan kar ke bana tha maKHdum

us ki har lai pe sitare raqsan

Hyderabad ke pyare raqsan

mard-e-ahan tha aqide ka jo paband raha

jang hi jang

jang-ju ho ke bhi KHursand raha

hae afsos ki hai ab wo mujahid marhum

KHidmat-e-ahl-e-watan kar ke bana tha maKHdum