man o tu

kitnī ūñchī uThā dī hai hijr kī sañgīn dīvār tū ne

lambī bahut lambī mashriqain se maġhribain tak

koī rauzan hai na darvāza is meñ

lagtā hai apne mo.ajiz-numā hāthoñ se banā.ī hai ḳhud tū ne

bilkul terī tarah or hai na chhor is kā

da.avā to kartā hai ki nazdīk-tar hai tū merī shah-rag se bhī

aur phir judā.ī ke ye saare jatan

terā merā rishta bhī azal se ajiib hai

tū hai nazar se ojhal tū hī qarīb hai

tū hī mirā habīb hai tū hī raqīb hai

to raat banātā hai maiñ charāġh jalātā aayā huuñ

hamāre darmiyān khiñchī dīvār meñ koī khiḌkī na rakkhī thī tū ne

dekh maiñ ne khiḌkiyoñ kī jagah jaḌī haiñ is meñ apnī āñkheñ

nigār-ḳhāna banā dayā hai maiñ ne andhī dīvār ko

is ke ek ek patthar ko raushan kar Daalā hai apnī āñkhoñ ke nuur se

aur har patthar par likh diyā hai terā naam maiñ ne

magar koī ek naam thoḌī hai terā

is liye har patthar par ek nayā naam likhā hai terā

vaise bhī mere liye tū hī to hai mere ḳhāliq

añdherā bhī hai tū ujālā bhī tū hai

agar rañg hai tū to ḳhushbū bhī tū hai

kāñTā hai tū gar to tū hai gulāb

ummīd bhī tū merī yaas bhī tū

saaqī bhī tū hai mirī pyaas bhī tū

mirā dard hai gar to hai chārāgar bhī

mirī maut hai tū masīhā bhī tū hai

sabhī kuchh hai tū aur tū hī hai sab kuchh

tire kaam saare tire naam saare

maiñ kuchh bhī nahīñ huuñ tirā kaam huuñ ik

maiñ kuchh bhī nahīñ huuñ tirā naam huuñ ik

kitni unchi uTha di hai hijr ki sangin diwar tu ne

lambi bahut lambi mashriqain se maghribain tak

koi rauzan hai na darwaza is mein

lagta hai apne moajiz-numa hathon se banai hai KHud tu ne

bilkul teri tarah or hai na chhor is ka

dawa to karta hai ki nazdik-tar hai tu meri shah-rag se bhi

aur phir judai ke ye sare jatan

tera mera rishta bhi azal se ajib hai

tu hai nazar se ojhal tu hi qarib hai

tu hi mera habib hai tu hi raqib hai

to raat banata hai main charagh jalata aaya hun

hamare darmiyan khinchi diwar mein koi khiDki na rakkhi thi tu ne

dekh main ne khiDkiyon ki jagah jaDi hain is mein apni aankhen

nigar-KHana bana daya hai main ne andhi diwar ko

is ke ek ek patthar ko raushan kar Dala hai apni aankhon ke nur se

aur har patthar par likh diya hai tera nam main ne

magar koi ek nam thoDi hai tera

is liye har patthar par ek naya nam likha hai tera

waise bhi mere liye tu hi to hai mere KHaliq

andhera bhi hai tu ujala bhi tu hai

agar rang hai tu to KHushbu bhi tu hai

kanTa hai tu gar to tu hai gulab

ummid bhi tu meri yas bhi tu

saqi bhi tu hai meri pyas bhi tu

mera dard hai gar to hai chaaragar bhi

meri maut hai tu masiha bhi tu hai

sabhi kuchh hai tu aur tu hi hai sab kuchh

tere kaam sare tere nam sare

main kuchh bhi nahin hun tera kaam hun ek

main kuchh bhi nahin hun tera nam hun ek