manzar-e-KHak

ye vaqt kitnī hī sadiyoñ se yuuñ

hasīn manzar bichhā rahā hai

yahī vo manDī hai jis meñ aa ke udaas chehre tujhe tasallī na de sakeñge

maiñ apne kamre meñ yuuñ hī baiThā har ek kash pe ye sochtā huuñ

ḳhudā ne jab ye jahāñ banāyā to is meñ aadam ko kyoñ basāyā

ye peḌ paudhe

ye chiil kavve

ye chāñd taare

ye surḳh shāmeñ

ye qalb-o-jāñ ke hasīn manzar

ye sab ke sab un tamām varshoñ kā qarz ab tak chukā rahe haiñ

ki jin meñ ujḌe hue chaman se sadā.eñ gūñjī thiiñ lā-makāñ kī

ḳhud apne ghar pe banā ke insāñ ḳhudā bhī ab ajnabī huā hai

vo ajnabī jo ināyatoñ aur navāzishoñ se navāztā hai

vo chāhtā hai ki dhīme dhīme zamīñ ko phir se ujaaḌ kar de

azaab nāzil hoñ is zamīñ par

aur āḳhirī meñ uThā ke pheñke har ek shar ko

jo is jahāñ ke har ek rañg meñ chhupā huā hai

dobāra phir se bane ye duniyā

aur is meñ aadam kā naam na ho

dobāra phir se base ye dhartī

na koī dukh ho

na koī mātam

na koī sukh ho

na koī mahram

jidhar talak bhī nazar ye jaa.e

hare-bhare hoñ vo saare manzar

magar ye mumkin na ho sakegā

maiñ apne kamre se phir nikal kar

sameT lūñgā sabhī ġhamoñ ko

ki jin ke kāran ye nazm merī thamī huī hai

baḌhī nahīñ hai vahīñ pe kab se rukī huī hai

jahāñ vo sadiyāñ rukī huī haiñ

jahāñ vo manzar ruke hue haiñ

ye waqt kitni hi sadiyon se yun

hasin manzar bichha raha hai

yahi wo manDi hai jis mein aa ke udas chehre tujhe tasalli na de sakenge

main apne kamre mein yun hi baiTha har ek kash pe ye sochta hun

KHuda ne jab ye jahan banaya to is mein aadam ko kyon basaya

ye peD paudhe

ye chil kawwe

ye chand tare

ye surKH shamen

ye qalb-o-jaan ke hasin manzar

ye sab ke sab un tamam warshon ka qarz ab tak chuka rahe hain

ki jin mein ujDe hue chaman se sadaen gunji thin la-makan ki

KHud apne ghar pe bana ke insan KHuda bhi ab ajnabi hua hai

wo ajnabi jo inayaton aur nawazishon se nawazta hai

wo chahta hai ki dhime dhime zamin ko phir se ujaD kar de

azab nazil hon is zamin par

aur aaKHiri mein uTha ke phenke har ek shar ko

jo is jahan ke har ek rang mein chhupa hua hai

dobara phir se bane ye duniya

aur is mein aadam ka nam na ho

dobara phir se base ye dharti

na koi dukh ho

na koi matam

na koi sukh ho

na koi mahram

jidhar talak bhi nazar ye jae

hare-bhare hon wo sare manzar

magar ye mumkin na ho sakega

main apne kamre se phir nikal kar

sameT lunga sabhi ghamon ko

ki jin ke karan ye nazm meri thami hui hai

baDhi nahin hai wahin pe kab se ruki hui hai

jahan wo sadiyan ruki hui hain

jahan wo manzar ruke hue hain