منظر کو کیا کروں

تنہا حسین حیات کے ساغر کو کیا کروں

ساتھی نہیں تو بادۂ کوثر کو کیا کروں

ہر حسن پر گماں ہے تجھے نقش یار کا

اے عشق تیرے وہم سراسر کو کیا کروں

روشن تھے جس کے نور سے بام اور آستاں

وہ جلوہ گر نہیں ہے تو اس گھر کو کیا کروں

جس میں وہ دل کشی ہے نہ وہ شان دلبری

ایسے حسین سے بھی حسیں تر کو کیا کروں

جس کی جھلک پہ لاکھ ستاروں کو رشک تھا

وہ لو نہیں تو مہر منور کو کیا کروں

اے ظرف دید تو ہی بتا بزم طور سے

جلوہ جو اٹھ گیا ہے تو منظر کو کیا کروں

اس کی طرف سے تو نہ تھی کوتاہیٔ کرم

ہندیؔ میں خود ہی اپنے مقدر کو کیا کروں