manzar ko kya karun

tanhā hasīn hayāt ke sāġhar ko kyā karūñ

sāthī nahīñ to bāda-e-kausar ko kyā karūñ

har husn par gumāñ hai tujhe naqsh-e-yār kā

ai ishq tere vahm-e-sarāsar ko kyā karūñ

raushan the jis ke nuur se baam aur āstāñ

vo jalva-gar nahīñ hai to us ghar ko kyā karūñ

jis meñ vo dilkashī hai na vo shān-e-dilbarī

aise hasīn se bhī hasīñ-tar ko kyā karūñ

jis kī jhalak pe laakh sitāroñ ko rashk thā

vo lau nahīñ to mehr-e-munavvar ko kyā karūñ

ai zarf-e-dīd tū hī batā bazm-e-tūr se

jalva jo uTh gayā hai to manzar ko kyā karūñ

us kī taraf se to na thī kotāhī-e-karam

'hindī' maiñ ḳhud hī apne muqaddar ko kyā karūñ

tanha hasin hayat ke saghar ko kya karun

sathi nahin to baada-e-kausar ko kya karun

har husn par guman hai tujhe naqsh-e-yar ka

ai ishq tere wahm-e-sarasar ko kya karun

raushan the jis ke nur se baam aur aastan

wo jalwa-gar nahin hai to us ghar ko kya karun

jis mein wo dilkashi hai na wo shan-e-dilbari

aise hasin se bhi hasin-tar ko kya karun

jis ki jhalak pe lakh sitaron ko rashk tha

wo lau nahin to mehr-e-munawwar ko kya karun

ai zarf-e-did tu hi bata bazm-e-tur se

jalwa jo uTh gaya hai to manzar ko kya karun

us ki taraf se to na thi kotahi-e-karam

'hindi' main KHud hi apne muqaddar ko kya karun