manzil

vo jis maqām pe kal the usī pe aaj haiñ ham

mire habībo javāñ-rāt kis qadar thī hasīñ

ye mere naqsh-e-qadam merī raah mere safar

mire ḳhayāl mirī justujū mirī hasrat

mirī umiid ko hai ilm aur kisī ko nahīñ

mire ḳhayāl se ḳhāmosh sahme sahme shajar

jo mujh ko takte the hairat se un ko bhī shāyad

javān raat ke joban kā ho koī ehsās

magar ye raat bhī ik ḳhvāb ban ke TuuT ga.ī

tamām raat rahī ye nigāh garm-e-safar

tamām raat sitāroñ ko mil sakā na sukūñ

tamām raat qadam fāsloñ se milte rahe

kahāñ kahāñ se maiñ guzrā nahīñ kuchh is kī ḳhabar

kabhī yaqīn ki vo vādī-e-sukūñ hai qarīb

kabhī ḳhayāl ki is raat kī sahar hī nahīñ

magar vo ālam-e-shab bhī guzar gayā āḳhir

milī na jab koī manzil to ho ga.e bezār

sitāre aur nigāhoñ se mere kaTne lage

jab āftāb ne dekhā mujhe to mere qadam

usī maqām pe the jis se shab ke saaya meñ

mire safar kī huī thī kal ibtidā mujh se

mire habībo hamārā ye mai-kada shāyad

hamāre fikr-o-amal kā ik aisā markaz hai

ki ham kahīñ bhī hoñ is se judā nahīñ hoñge

kabhī kabhī to ye lagtā hai TuuT jā.egā dil

ye justujū-e-musalsal ye zulmateñ ye safar

hamāre zehn meñ jo hai vo is jahāñ meñ nahīñ

agar yahī hai haqīqat to kyoñ na dil rakkheñ

ye mai-kada hai to raḳht-e-safar bahut ya.anī

kabhī to aisā maqām aa hī jā.egā āḳhir

jahāñ ye kah de taḳhayyul kamāl hai to yahāñ

rahe ḳhayāl irāde raheñ javāñ apne

zarā pukārnā saaqī ko hai kahāñ masrūf

mire ḳhayāl se ik daur aur ho jaa.e

wo jis maqam pe kal the usi pe aaj hain hum

mere habibo jawan-raat kis qadar thi hasin

ye mere naqsh-e-qadam meri rah mere safar

mere KHayal meri justuju meri hasrat

meri umid ko hai ilm aur kisi ko nahin

mere KHayal se KHamosh sahme sahme shajar

jo mujh ko takte the hairat se un ko bhi shayad

jawan raat ke joban ka ho koi ehsas

magar ye raat bhi ek KHwab ban ke TuT gai

tamam raat rahi ye nigah garm-e-safar

tamam raat sitaron ko mil saka na sukun

tamam raat qadam faslon se milte rahe

kahan kahan se main guzra nahin kuchh is ki KHabar

kabhi yaqin ki wo wadi-e-sukun hai qarib

kabhi KHayal ki is raat ki sahar hi nahin

magar wo aalam-e-shab bhi guzar gaya aaKHir

mili na jab koi manzil to ho gae bezar

sitare aur nigahon se mere kaTne lage

jab aaftab ne dekha mujhe to mere qadam

usi maqam pe the jis se shab ke saya mein

mere safar ki hui thi kal ibtida mujh se

mere habibo hamara ye mai-kada shayad

hamare fikr-o-amal ka ek aisa markaz hai

ki hum kahin bhi hon is se juda nahin honge

kabhi kabhi to ye lagta hai TuT jaega dil

ye justuju-e-musalsal ye zulmaten ye safar

hamare zehn mein jo hai wo is jahan mein nahin

agar yahi hai haqiqat to kyon na dil rakkhen

ye mai-kada hai to raKHt-e-safar bahut yani

kabhi to aisa maqam aa hi jaega aaKHir

jahan ye kah de taKHayyul kamal hai to yahan

rahe KHayal irade rahen jawan apne

zara pukarna saqi ko hai kahan masruf

mere KHayal se ek daur aur ho jae