maqam-e-aKHir-e-shab

tujhe hai shikva ki shahr-e-nigār chhoḌ ke maiñ

nashāt-e-shām-e-tarab kī bahār chhoḌ ke maiñ

na jaane kaun sī bastī meñ jā basā huuñ aaj

na.ī hayāt ke be-rang dā.eroñ kī qasam

na koī dost na koī rafīq-e-manzil-e-ġham

hayāt-o-maut ke do-rāhe par khaḌā huuñ aaj

mirī hayāt hai ḳhud ek be-karāñ sahrā

na jis meñ sāya-e-gul hai na jis meñ raqs-e-sabā

na tere jism kī ḳhushbū na pairahan kī damak

na chūḌiyoñ ke chhanāke na qahqahoñ kī khanak

na āñchaloñ kī bahāreñ na ārizoñ ke sharār

na tere sīna-e-nauras ke zer-o-bam kā ḳhumār

na zikr-e-surḳhī-e-lab aur na terī chashm kī baat

tirī jabīñ kā ujālā na terī zulf kī raat

qadam qadam pe bagūle ravish ravish pe babūl

nazar nazar se ulajhte hue ye vīrāne

hazār sadiyoñ kī afsurdagī sameTe hue

har ek zarre meñ pinhāñ haiñ laakh afsāne

na jaane kitnī pur-armān dulhanoñ ke ḳhvāb

lahū meñ role ga.e ḳhaak meñ milā.e ga.e

na jaane azmat-e-ādam ke kis qadar mahtāb

qafas kī zulmat-e-shab-tāb meñ chhupā.e ga.e

na jaane kitne shahoñ ne ba-nām-e-lutf-o-karam

mahaktī kaliyoñ se apne haram sajā.e haiñ

na jaane kitne shahoñ ne ba-faiz-e-jabr-o-sitam

gudāz-jism javāñ-e-lab yahāñ churā.e haiñ

na jaane kitnī nigāhoñ se nuur chhīnā gayā

dayār-e-dard ke mahloñ kī raushnī ke liye

na jaane kitne diloñ se lahū nichoḌā gayā

na.e ḳhudāoñ ke chehroñ kī tāzgī ke liye

na jaane kitne gharoñ ke diye bujhā.e ga.e

shaboñ ke rāj-dulāroñ kī zindagī ke liye

dayār-e-sabza-o-naġhma se duur sahrā meñ

maiñ chun rahā huuñ vo anmol āñsuoñ ke phuul

jinheñ bahār ne Thukrā diyā hiqārat se

jinheñ ḳhizāoñ kā dāman bhī kar sakā na qubūl

Tapak ke aañkh se jo kho ga.e añdheroñ meñ

in āñsuoñ se jalā.eñge zindagī ke charāġh

ubal paḌeñgī jabīnoñ se nuur kī kirneñ

sulag uTheñgī umañgeñ dahak uTheñge dimāġh

na.ī hayāt ke be-rang dā.eroñ kī qasam

uThā ke sub.h-e-tamannā ke zarfishāñ-parcham

maqām-e-āḳhir-e-shab se guzar rahe haiñ aaj

tujhe hai shikwa ki shahr-e-nigar chhoD ke main

nashat-e-sham-e-tarab ki bahaar chhoD ke main

na jaane kaun si basti mein ja basa hun aaj

nai hayat ke be-rang daeron ki qasam

na koi dost na koi rafiq-e-manzil-e-gham

hayat-o-maut ke do-rahe par khaDa hun aaj

meri hayat hai KHud ek be-karan sahra

na jis mein saya-e-gul hai na jis mein raqs-e-saba

na tere jism ki KHushbu na pairahan ki damak

na chuDiyon ke chhanake na qahqahon ki khanak

na aanchalon ki bahaaren na aarizon ke sharar

na tere sina-e-nauras ke zer-o-bam ka KHumar

na zikr-e-surKHi-e-lab aur na teri chashm ki baat

teri jabin ka ujala na teri zulf ki raat

qadam qadam pe bagule rawish rawish pe babul

nazar nazar se ulajhte hue ye virane

hazar sadiyon ki afsurdagi sameTe hue

har ek zarre mein pinhan hain lakh afsane

na jaane kitni pur-arman dulhanon ke KHwab

lahu mein role gae KHak mein milae gae

na jaane azmat-e-adam ke kis qadar mahtab

qafas ki zulmat-e-shab-tab mein chhupae gae

na jaane kitne shahon ne ba-nam-e-lutf-o-karam

mahakti kaliyon se apne haram sajae hain

na jaane kitne shahon ne ba-faiz-e-jabr-o-sitam

gudaz-jism jawan-e-lab yahan churae hain

na jaane kitni nigahon se nur chhina gaya

dayar-e-dard ke mahlon ki raushni ke liye

na jaane kitne dilon se lahu nichoDa gaya

nae KHudaon ke chehron ki tazgi ke liye

na jaane kitne gharon ke diye bujhae gae

shabon ke raj-dularon ki zindagi ke liye

dayar-e-sabza-o-naghma se dur sahra mein

main chun raha hun wo anmol aansuon ke phul

jinhen bahaar ne Thukra diya hiqarat se

jinhen KHizaon ka daman bhi kar saka na qubul

Tapak ke aankh se jo kho gae andheron mein

in aansuon se jalaenge zindagi ke charagh

ubal paDengi jabinon se nur ki kirnen

sulag uThengi umangen dahak uThenge dimagh

nai hayat ke be-rang daeron ki qasam

uTha ke subh-e-tamanna ke zarfishan-parcham

maqam-e-aKHir-e-shab se guzar rahe hain aaj