maqam-e-saKHt par nigah

maiñ ne apnī dukh bharī vafāt

apnī zindagī kī āḳhirī tavīl raat

bhārī raat dekh lī

maiñ ek musht-e-be-zarar

ḳhud apne ḳhāndāñ ke makr ko bhugat chukā

barat chukā huuñ

apne āḳhirī karīm saañs ko

nigal chukā

siyah dinoñ kī dhuul maiñ

uThā chukā

ahāta-e-vujūd se

uge hazār rang ke hazār phuul maiñ

nahīñ tyāgnā nahīñ

vujūd apnā maiñ ne is tarah

maiñ apnī raakh apne haath se nahīñ uḌā.ūñgā

khaḌe raheñge log

yūñhī saf-ba-saf

kisī ke haath maiñ na ā.ūñgā

kafan ko oḌh kar baḌhā huā huuñ maiñ

kafan ko oḌh kar nahīñ marūñgā maiñ

kisī ke qutb-e-munjamid meñ

apne aap ko nahīñ hai gālnā mujhe

jo asl sat hai asl zar hai

biich meñ kahīñ chamaktī ret kī tarah paḌā huā

nahīñ nikālnā mujhe

maiñ kar ke murtakiz maqām-e-saḳht par nigāh

apne haath paañv dekhne lagā

dimāġh kī rageñ

ubhar ke kanpaTī ko surḳh kar ga.iiñ

maiñ apne kāñdhe apnā peT

apnā darmiyān

apnī dhūp-chhāñv dekhne lagā

maiñ ḳhud ko lahza lahza ḳhud meñ joḌne lagā

maiñ saañs toḌtā huā zamīñ ko chhoḌne lagā

main ne apni dukh bhari wafat

apni zindagi ki aaKHiri tawil raat

bhaari raat dekh li

main ek musht-e-be-zarar

KHud apne KHandan ke makr ko bhugat chuka

barat chuka hun

apne aaKHiri karim sans ko

nigal chuka

siyah dinon ki dhul main

uTha chuka

ahata-e-wujud se

uge hazar rang ke hazar phul main

nahin tyagna nahin

wujud apna main ne is tarah

main apni rakh apne hath se nahin uDaunga

khaDe rahenge log

yunhi saf-ba-saf

kisi ke hath main na aaunga

kafan ko oDh kar baDha hua hun main

kafan ko oDh kar nahin marunga main

kisi ke qutb-e-munjamid mein

apne aap ko nahin hai galna mujhe

jo asl sat hai asl zar hai

bich mein kahin chamakti ret ki tarah paDa hua

nahin nikalna mujhe

main kar ke murtakiz maqam-e-saKHt par nigah

apne hath panw dekhne laga

dimagh ki ragen

ubhar ke kanpaTi ko surKH kar gain

main apne kandhe apna peT

apna darmiyan

apni dhup-chhanw dekhne laga

main KHud ko lahza lahza KHud mein joDne laga

main sans toDta hua zamin ko chhoDne laga