maqbara

ye merā kamra

mire buzurgoñ kā ek tohfa

virāsatoñ kā rivāyatoñ kā ināyatoñ kā

aziim vāris

purānī yādoñ purānī bātoñ purānī qadroñ kā

ik atiyya

agarche naqsh-o-nigār is ke

ġham-e-zamāna kī āñdhiyoñ se

vo rang-o-roġhan vo kaif-o-mastī

har ek ḳhūbī ko kho chuke haiñ

magar hai phir bhī aziiz mujh ko

har ek dīvār ab hai ḳhasta

har ek mehrāb hai shikasta

vo farsh jis par kisī zamāna meñ farsh-e-maḳhmal bichhā huā thā

magar koī mah-jabīñ thirak kar

ye gā rahī thī

farsh-e-maḳhmal pe mire paañv chhile jaate haiñ

na farsh-e-maḳhmal na pā-e-nāzuk

chaTā.iyāñ kuchh bichhī huī haiñ

jahāñ pe fānūs jal rahā thā

vahāñ pe ab ik diyā hai raushan

jo shaam hī se bujhā bujhā sā

charāġh-e-muflis kī tarah yaaro

sisak rahā hai

ye merā kamra

mire buzurgoñ kā ek tohfa

maiñ sochtā huuñ maiñ jāntā huuñ

ki is kī buniyād kyoñ paḌī thī

maiñ dekhtā huuñ

ki ab bhī baaqī haiñ is fazā meñ

purānī tahzīb ke pujārī

vahī rivāyāt-e-shahryārī

vahī hai jang-e-ġhurūr jaarī

maiñ sochtā huuñ ki in rivāyāt ke dhuñdalkoñ se kaise niklūñ

mire lahū kī tamām gardish

mirī zabāñ kā har ek jumla

mirī nazar kā har ek manzar

mire badan kī har ek laġhzish

ye chāhtī hai ki is rivāyat ke maqbare ko

kisī jahannum meñ pheñk aa.uuñ

magar maiñ phir sochtā huuñ yaaro

ki har mahīne kī biis tārīḳh hī se kahtī hai dil kī dhaḌkan

ki haath roko

zarūratoñ kī ridā sameTo

nahīñ to chādar se paañv bāhar nikal paḌeñge

ye mashvare dil ke hoñ to socho

nayā makāñ kis tarah banegā

nahīñ nahīñ maiñ nahīñ girā.uñgā shahryāroñ ke is khañDar ko

ki sar chhupāne ke vāste ab kahīñ jagah bhī na mil sakegī

ye merā kamra

mire buzurgoñ kā ek tohfa

maiñ is kā vāris ye merā vāris

ye mera kamra

mere buzurgon ka ek tohfa

wirasaton ka riwayaton ka inayaton ka

azim waris

purani yaadon purani baaton purani qadron ka

ek atiyya

agarche naqsh-o-nigar is ke

gham-e-zamana ki aandhiyon se

wo rang-o-roghan wo kaif-o-masti

har ek KHubi ko kho chuke hain

magar hai phir bhi aziz mujh ko

har ek diwar ab hai KHasta

har ek mehrab hai shikasta

wo farsh jis par kisi zamana mein farsh-e-maKHmal bichha hua tha

magar koi mah-jabin thirak kar

ye ga rahi thi

farsh-e-maKHmal pe mere panw chhile jate hain

na farsh-e-maKHmal na pa-e-nazuk

chaTaiyan kuchh bichhi hui hain

jahan pe fanus jal raha tha

wahan pe ab ek diya hai raushan

jo sham hi se bujha bujha sa

charagh-e-muflis ki tarah yaro

sisak raha hai

ye mera kamra

mere buzurgon ka ek tohfa

main sochta hun main jaanta hun

ki is ki buniyaad kyon paDi thi

main dekhta hun

ki ab bhi baqi hain is faza mein

purani tahzib ke pujari

wahi riwayat-e-shahryari

wahi hai jang-e-ghurur jari

main sochta hun ki in riwayat ke dhundalkon se kaise niklun

mere lahu ki tamam gardish

meri zaban ka har ek jumla

meri nazar ka har ek manzar

mere badan ki har ek laghzish

ye chahti hai ki is riwayat ke maqbare ko

kisi jahannum mein phenk aaun

magar main phir sochta hun yaro

ki har mahine ki bis tariKH hi se kahti hai dil ki dhaDkan

ki hath roko

zaruraton ki rida sameTo

nahin to chadar se panw bahar nikal paDenge

ye mashware dil ke hon to socho

naya makan kis tarah banega

nahin nahin main nahin giraunga shahryaron ke is khanDar ko

ki sar chhupane ke waste ab kahin jagah bhi na mil sakegi

ye mera kamra

mere buzurgon ka ek tohfa

main is ka waris ye mera waris