maqsadiyat

mire pyāre ḳhudāvandā

mujhe jab kun kī saa.at meñ

tire be-aib yaktā dast-e-qudrat ne

tire aadam kī baaqī bach rahī miTTī se gūñdhā thā

mirā naqsha banāyā thā

to mujh meñ kyā tire aadam se kamtar ruuh phūñkī thī

ki jaise be-dilī ujlat meñ koī kaam nimTāyā

mirī taḳhlīq kyā ḳhāliq

tirī chashm-e-tasavvur kī

kisī mansūba-sāzī kī nahīñ marhūn-e-minnat bhī

mujhe paidā kiyā tū ne kisī duuje kī ḳhātir kyā

tirī hikmat ke saare kār-ḳhānoñ meñ

nahīñ kuchh tazkira merā

mujhī par tohmat-e-avval hai aadam ke bhaTakne kī

usī din se ye aadam jab kabhī bhaTkā hai ai maulā

tamām ilzām merī zaat se mansūb rahtā hai

zamīñ pe maiñ tire naa.eb kī naa.eb huuñ

usī kī har zarūrat kā maiñ sāmāñ huuñ

mujhe ab zindagī-bhar ek saaya ban ke jiinā hai

kisī aadam kī ḳhvāhish aur marzī meñ Dhalā

ik aks ban kar zinda rahnā hai

mire taḳhlīq hone kī yahī kyā maqsadiyyat hai

mire pyāre ḳhudāvandā mujhe kyūñkar na-jāne

apne be-vaq.at fasāne ke havāloñ meñ

kahīñ par jhol lagtā hai ye qissa kuchh ajab sā hai

ki arz-o-arsh kā mālik jo hai insāf kā ḳhāliq

vo itnī be-ruḳhī be-e'tinā.ī kaise bartegā

vo ḳhud kāmil hai phir nāqis ye paikar kyuuñ tarāshegā

kisī kī dil-lagī meñ kyuuñ mujhe duniyā meñ lā.egā

mujhe aisā bhī lagtā hai

ki ye gutthī bahut par pech farsūda ḳhayāloñ kī

kabhī to hal bhī honī hai

aur is andher nagrī meñ

azal se kamtarī kā bojh Dhotī bint-e-havvā kī

daraḳhshāñ kal bhī honī hai

mere pyare KHudawanda

mujhe jab kun ki saat mein

tere be-aib yakta dast-e-qudrat ne

tere aadam ki baqi bach rahi miTTi se gundha tha

mera naqsha banaya tha

to mujh mein kya tere aadam se kamtar ruh phunki thi

ki jaise be-dili ujlat mein koi kaam nimTaya

meri taKHliq kya KHaliq

teri chashm-e-tasawwur ki

kisi mansuba-sazi ki nahin marhun-e-minnat bhi

mujhe paida kiya tu ne kisi duje ki KHatir kya

teri hikmat ke sare kar-KHanon mein

nahin kuchh tazkira mera

mujhi par tohmat-e-awwal hai aadam ke bhaTakne ki

usi din se ye aadam jab kabhi bhaTka hai ai maula

tamam ilzam meri zat se mansub rahta hai

zamin pe main tere naeb ki naeb hun

usi ki har zarurat ka main saman hun

mujhe ab zindagi-bhar ek saya ban ke jina hai

kisi aadam ki KHwahish aur marzi mein Dhala

ek aks ban kar zinda rahna hai

mere taKHliq hone ki yahi kya maqsadiyyat hai

mere pyare KHudawanda mujhe kyunkar na-jaane

apne be-waqat fasane ke hawalon mein

kahin par jhol lagta hai ye qissa kuchh ajab sa hai

ki arz-o-arsh ka malik jo hai insaf ka KHaliq

wo itni be-ruKHi be-e'tinai kaise bartega

wo KHud kaamil hai phir naqis ye paikar kyun tarashega

kisi ki dil-lagi mein kyun mujhe duniya mein laega

mujhe aisa bhi lagta hai

ki ye gutthi bahut par pech farsuda KHayalon ki

kabhi to hal bhi honi hai

aur is andher nagri mein

azal se kamtari ka bojh Dhoti bint-e-hawwa ki

daraKHshan kal bhi honi hai