maqsud-e-ulfat

kyā mire husn-e-dil-āvez pe tū martā hai

sho.ala-rūī pe mirī jaan fidā kartā hai

ye agar sach hai to jā mujh se mohabbat mat kar

nigah-e-ishq ruḳh-e-mahr-e-jahāñ-tāb pe Daal

husn-e-be-misl ko jis ke na ajal hai na zavāl

kam-sinī par mirī maa.il hai tabī.at terī

husn-e-nau-ḳhez se vābasta hai ulfat terī

ye agar sach hai to jā mujh se mohabbat mat kar

terī ulfat ke hai qābil ruḳh-e-zebā-e-bahār

jis ke anmol javāhar kā nahīñ koī shumār

chāhtā hai mujhe tū kyā mirī hashmat ke liye

dil hai bekal tirā mere zar-o-daulat ke liye

ye agar sach hai to jā mujh se mohabbat mat kar

chāhiye tujh ko kare bahr-e-guhar-ḳhez se pyaar

jis ke anmol javāhar kā nahīñ koī shumār

pyaar mujh se hai tujhe kyā mirī ulfat ke liye

dil hai parvāna tirā sham-e-mohabbat ke liye

ye agar sach hai to kar mujh se mohabbat pyāre

behtar az mehr-o-bahār-e-dil-e-shaidā merā

bahr meñ bhī nahīñ aisā guhar-e-mehr-o-vafā

kya mere husn-e-dil-awez pe tu marta hai

shoala-rui pe meri jaan fida karta hai

ye agar sach hai to ja mujh se mohabbat mat kar

nigah-e-ishq ruKH-e-mahr-e-jahan-tab pe Dal

husn-e-be-misl ko jis ke na ajal hai na zawal

kam-sini par meri mail hai tabiat teri

husn-e-nau-KHez se wabasta hai ulfat teri

ye agar sach hai to ja mujh se mohabbat mat kar

teri ulfat ke hai qabil ruKH-e-zeba-e-bahaar

jis ke anmol jawahar ka nahin koi shumar

chahta hai mujhe tu kya meri hashmat ke liye

dil hai bekal tera mere zar-o-daulat ke liye

ye agar sach hai to ja mujh se mohabbat mat kar

chahiye tujh ko kare bahr-e-guhar-KHez se pyar

jis ke anmol jawahar ka nahin koi shumar

pyar mujh se hai tujhe kya meri ulfat ke liye

dil hai parwana tera sham-e-mohabbat ke liye

ye agar sach hai to kar mujh se mohabbat pyare

behtar az mehr-o-bahaar-e-dil-e-shaida mera

bahr mein bhi nahin aisa guhar-e-mehr-o-wafa