maqule par amal

tamāshā ik ajab sā ek din yuuñ raah meñ dekhā

kisī ko dekhte haiñ log ik majma.a ikaTThā hai

aTā hai dhuul meñ ik naujavāñ miTTī meñ leTā hai

uThā kar gard apne jism sar chehre pe maltā hai

kisī kī kuchh nahīñ suntā na hañstā hai na rotā hai

vo bas ḳhāmosh farsh-e-ḳhāk par yūñhī taḌaptā hai

baḌī mushkil se sab ne naujavāñ ko rok kar pūchhā

tumhārī is pareshānī kā batlāo sabab kyā hai

kahā us naujavāñ ne aap sab nāhaq pareshāñ haiñ

samajh sakte nahīñ haiñ aap ki mujh ko huā kyā hai

na pāgal huuñ na majnūñ huuñ na hai koī maraz mujh ko

amal pairā huuñ maiñ jis par purānā ik maqūla hai

miTā de apnī hastī ko agar kuchh martaba chāhiye

ki daana ḳhaak meñ mil kar gul-e-gulzār hotā hai

tamasha ek ajab sa ek din yun rah mein dekha

kisi ko dekhte hain log ek majma ikaTTha hai

aTa hai dhul mein ek naujawan miTTi mein leTa hai

uTha kar gard apne jism sar chehre pe malta hai

kisi ki kuchh nahin sunta na hansta hai na rota hai

wo bas KHamosh farsh-e-KHak par yunhi taDapta hai

baDi mushkil se sab ne naujawan ko rok kar puchha

tumhaari is pareshani ka batlao sabab kya hai

kaha us naujawan ne aap sab nahaq pareshan hain

samajh sakte nahin hain aap ki mujh ko hua kya hai

na pagal hun na majnun hun na hai koi maraz mujh ko

amal paira hun main jis par purana ek maqula hai

miTa de apni hasti ko agar kuchh martaba chahiye

ki dana KHak mein mil kar gul-e-gulzar hota hai