marg-e-gul se peshtar

sab darīche band haiñ tum kuchh kaho

tum samajhte ho garebāñ-chāk huuñ

maiñ to andoh-e-samā.at ke jarāsīmoñ se

bilkul paak huuñ

nāla-e-bebāk huuñ

sab darīche band haiñ tum kuchh kaho

tum samajhte ho ki bīnā.ī ga.ī

bujh gayā har rauzan-e-dīvār chup hai raushnī

nīm-vā hai tīrgī

ye shaguft-e-ġhuncha-e-lab kī sadā

vo hasīñ qaus-e-quzah rañgīñ-qabā

dhaḌkanoñ kā silsila

sab darīche band haiñ tum kuchh kaho

tum samajhte ho ki saarī uñgliyāñ patthar kī haiñ

kyuuñ qalam ke ḳhushk hoñToñ se

koī kāġhaz chhueñ

ism-e-āzam kī likheñ

sab darīche band haiñ tum kuchh kaho

tum samajhte ho ki ḳhvāboñ meñ ḳhayāloñ ko liye

laḌkhaḌā.eñge hamesha vasl kī ḳhvāhish meñ

yūñhī bin piye

apne hoñToñ ko siye

maiñ samajhtā huuñ ai mere chāra-gar

marg-e-gul se peshtar

ik siyah sho.ala sā kartā hai tavāf-e-bū-e-jāñ

lekin ai jān-e-jahāñ

chhū añgusht-e-shahādat se koī nok-e-sināñ

maiñ likhūñgā tere chehre par vo anmiT dāstāñ

zindagī sach bol de

jo sab darīche khol de

zindagī sach bol de

sab dariche band hain tum kuchh kaho

tum samajhte ho gareban-chaak hun

main to andoh-e-samaat ke jarasimon se

bilkul pak hun

nala-e-bebak hun

sab dariche band hain tum kuchh kaho

tum samajhte ho ki binai gai

bujh gaya har rauzan-e-diwar chup hai raushni

nim-wa hai tirgi

ye shaguft-e-ghuncha-e-lab ki sada

wo hasin qaus-e-quzah rangin-qaba

dhaDkanon ka silsila

sab dariche band hain tum kuchh kaho

tum samajhte ho ki sari ungliyan patthar ki hain

kyun qalam ke KHushk honTon se

koi kaghaz chhuen

ism-e-azam ki likhen

sab dariche band hain tum kuchh kaho

tum samajhte ho ki KHwabon mein KHayalon ko liye

laDkhaDaenge hamesha wasl ki KHwahish mein

yunhi bin piye

apne honTon ko siye

main samajhta hun ai mere chaara-gar

marg-e-gul se peshtar

ek siyah shoala sa karta hai tawaf-e-bu-e-jaan

lekin ai jaan-e-jahan

chhu angusht-e-shahadat se koi nok-e-sinan

main likhunga tere chehre par wo anmiT dastan

zindagi sach bol de

jo sab dariche khol de

zindagi sach bol de