marna ya jina achchha hai

ye mas.ala hai darpesh yahāñ marnā yā jiinā achchhā hai

hastī kā zahr-bharā sāġhar toḌeñ yā piinā achchhā hai

taqdīr se shikva lāzim hai yā chup hī rahnā achchhā hai

māhaul se Takkar lī jaa.e yā sadma sahnā achchhā hai

kyā maut ke mīThe sharbat ko hoñToñ se lagānā achchhā hai

yā ranj-o-alam ko sah lenā ġham meñ ghul jaanā achchhā hai

ham maut ke mīThe sāġhar ko hoñToñ se lagā to sakte haiñ

ham ḳhaak ke bistar par so kar har ġham ko bhulā to sakte haiñ

lekin is maut kī vaadī meñ jā kar kyā jaane kyā hogā

vo vaadī kis ne dekhī hai us kā manzar kaisā hogā

ye soch ke chup rah jaate haiñ dukh sahte haiñ ġham khāte haiñ

is ranj-o-alam kī bastī meñ aise hī din kaT jaate haiñ

ye sabr na ho to duniyā meñ āfāt gavārā kaun kare

har roz kī zahmat kaun sahe har baat gavārā kaun kare

jābir kā tashaddud sahte haiñ ulfat meñ dhokā khāte haiñ

jo ham se nafrat karte haiñ ham un ke naaz uThāte haiñ

hākim chāhe jaisā bhī ho ham us kī latāḌeñ sahte haiñ

ġhairat ko Thokar lagtī hai dil hī meñ kuḌhte rahte haiñ

andher hai kaisā duniyā meñ us ke qānūn nirāle haiñ

yā-rab ye kaisī duniyā hai kaise ye duniyā vaale haiñ

kam-zarf kamīne logoñ ne har jānib Dere Daale haiñ

bāhar se to ye sab achchhe haiñ lekin andar se kaale haiñ

bad-zauq kamīne logoñ se ham jaan chhuḌā to sakte haiñ

hastī kī har ek musībat se chhuTkārā pā to sakte haiñ

in sab kā maut ilaaj to hai lekin mar kar bhī kyā hogā

mar kar bhī chain agar na milā phir kaisā haal apnā hogā

jiine se marnā āsāñ hai lekin majbūr haiñ jiine par

hastī kā sāġhar kaḌvā hai lekin majbūr haiñ piine par

ye duniyā ham ne dekhī hai duniyā kī jafā.eñ dekhī haiñ

us duniyā kā kuchh ilm nahīñ is kī to balā.eñ dekhī haiñ

ye soch ke ham is duniyā meñ āfāt gavārā karte haiñ

dukh sahte haiñ ġham sahte haiñ har baat gavārā karte haiñ

ye masala hai darpesh yahan marna ya jina achchha hai

hasti ka zahr-bhara saghar toDen ya pina achchha hai

taqdir se shikwa lazim hai ya chup hi rahna achchha hai

mahaul se Takkar li jae ya sadma sahna achchha hai

kya maut ke miThe sharbat ko honTon se lagana achchha hai

ya ranj-o-alam ko sah lena gham mein ghul jaana achchha hai

hum maut ke miThe saghar ko honTon se laga to sakte hain

hum KHak ke bistar par so kar har gham ko bhula to sakte hain

lekin is maut ki wadi mein ja kar kya jaane kya hoga

wo wadi kis ne dekhi hai us ka manzar kaisa hoga

ye soch ke chup rah jate hain dukh sahte hain gham khate hain

is ranj-o-alam ki basti mein aise hi din kaT jate hain

ye sabr na ho to duniya mein aafat gawara kaun kare

har roz ki zahmat kaun sahe har baat gawara kaun kare

jabir ka tashaddud sahte hain ulfat mein dhoka khate hain

jo hum se nafrat karte hain hum un ke naz uThate hain

hakim chahe jaisa bhi ho hum us ki lataDen sahte hain

ghairat ko Thokar lagti hai dil hi mein kuDhte rahte hain

andher hai kaisa duniya mein us ke qanun nirale hain

ya-rab ye kaisi duniya hai kaise ye duniya wale hain

kam-zarf kamine logon ne har jaanib Dere Dale hain

bahar se to ye sab achchhe hain lekin andar se kale hain

bad-zauq kamine logon se hum jaan chhuDa to sakte hain

hasti ki har ek musibat se chhuTkara pa to sakte hain

in sab ka maut ilaj to hai lekin mar kar bhi kya hoga

mar kar bhi chain agar na mila phir kaisa haal apna hoga

jine se marna aasan hai lekin majbur hain jine par

hasti ka saghar kaDwa hai lekin majbur hain pine par

ye duniya hum ne dekhi hai duniya ki jafaen dekhi hain

us duniya ka kuchh ilm nahin is ki to balaen dekhi hain

ye soch ke hum is duniya mein aafat gawara karte hain

dukh sahte hain gham sahte hain har baat gawara karte hain