marne ka KHauf

sar-zamīn-e-tamannā kī miTTī salāḳheñ ugāne lagī hai

giraftār hone kā mausam

sar-e-qarya-e-ārzū

āftāb-e-halākat kī sūrat chamakne lagā hai

shuāoñ ke nokīle panjoñ ne jismoñ ko zaḳhmī kiyā hai

bhañvar dar bhañvar raushnī ke samundar

tūfān qaidī hue

ye bastī gunāhoñ se ma.amūr āfat-rasīdoñ kī bastī hai

nau-zā.ida aarzū intihāoñ ke imkāñ sameTe

zamīroñ meñ luthḌī jarā.em-zada ḳhvāhishoñ ko

miTā.e to kaise

ragoñ ke darīchoñ se lipTī fasīloñ ko rezoñ kī sūrat

havā meñ uchhāle to kaise

ki us kā navishta faqat az-sar-e-nau giraftār honā

ne dā.eroñ ke tasallut meñ jiinā

siyāhī ke bātin meñ maujūd ġhāroñ meñ rahnā

halākat kī sar-chashma-gāhoñ se

āzād rahne kī azmat se vāqif havāo

hamārī fasīloñ kī jānib bhī aao

hameñ ye batāo

giraftār honā hamārā navishta nahīñ thā

irādoñ meñ maujūd tauq-o-salāsil

havasnāk dahshat

tamannā kī miTTī meñ faulād hote rahe haiñ

ḳhud apnī tavānā haqīqat

giraftār karne se qāsir rahe maiñ

sar-zamin-e-tamanna ki miTTi salaKHen ugane lagi hai

giraftar hone ka mausam

sar-e-qarya-e-arzu

aaftab-e-halakat ki surat chamakne laga hai

shuaon ke nokile panjon ne jismon ko zaKHmi kiya hai

bhanwar dar bhanwar raushni ke samundar

tufan qaidi hue

ye basti gunahon se mamur aafat-rasidon ki basti hai

nau-zaida aarzu intihaon ke imkan sameTe

zamiron mein luthDi jaraem-zada KHwahishon ko

miTae to kaise

ragon ke darichon se lipTi fasilon ko rezon ki surat

hawa mein uchhaale to kaise

ki us ka nawishta faqat az-sar-e-nau giraftar hona

ne daeron ke tasallut mein jina

siyahi ke baatin mein maujud ghaaron mein rahna

halakat ki sar-chashma-gahon se

aazad rahne ki azmat se waqif hawao

hamari fasilon ki jaanib bhi aao

hamein ye batao

giraftar hona hamara nawishta nahin tha

iradon mein maujud tauq-o-salasil

hawasnak dahshat

tamanna ki miTTi mein faulad hote rahe hain

KHud apni tawana haqiqat

giraftar karne se qasir rahe main