marsiya hazrat-e-beKHud dehlawi

ghir ke kyoñ aa.e haiñ yuuñ ranj-o-alam

shaam ye kyoñ ban ga.ī hai shām-e-ġham

jā rahā hai kaun ye oḌhe kafan

ro rahe haiñ kis ko sab ahl-e-suḳhan

haal hai abtar suḳhan ke baaġh kā

daaġh hai ye jānashīn-e-'dāġh' kā

ho ga.ī hai aaj urdu kyoñ udaas

mātamī hai kis liye is kā libās

kaun hogā is zabāñ kā pāsbāñ

kaun ab bolegā dillī kī zabāñ

sher sun kar kis kā hoñge shād-kām

kaun samjhā.egā lafzoñ kā maqām

ḳhāmiyoñ par kis ko ġhussa aa.egā

kaun mohmal lafz par jhallā.egā

ik sadī ke inqilāboñ kā bayāñ

kaun dohrā.egā ab vo dāstāñ

be-ḳhudī to saath 'beḳhud' ke ga.ī

rah ga.ī hai hosh kī fitnagarī

qaum par hotā hai ik saaya adiib

mulk kā hotā hai sarmāya adiib

ḳhidmat-e-sher-o-adab kartā hai vo

maut aane se nahīñ martā hai vo

kaun kahtā hai ki 'beḳhud' mar ga.e

naam lā-fānī vo paidā kar ga.e

thak ga.e the umr bhar ke kaam se

so rahe haiñ qabr meñ ārām se

ghir ke kyon aae hain yun ranj-o-alam

sham ye kyon ban gai hai sham-e-gham

ja raha hai kaun ye oDhe kafan

ro rahe hain kis ko sab ahl-e-suKHan

haal hai abtar suKHan ke bagh ka

dagh hai ye jaanashin-e-'dagh' ka

ho gai hai aaj urdu kyon udas

matami hai kis liye is ka libas

kaun hoga is zaban ka pasban

kaun ab bolega dilli ki zaban

sher sun kar kis ka honge shad-kaam

kaun samjhaega lafzon ka maqam

KHamiyon par kis ko ghussa aaega

kaun mohmal lafz par jhallaega

ek sadi ke inqilabon ka bayan

kaun dohraega ab wo dastan

be-KHudi to sath 'beKHud' ke gai

rah gai hai hosh ki fitnagari

qaum par hota hai ek saya adib

mulk ka hota hai sarmaya adib

KHidmat-e-sher-o-adab karta hai wo

maut aane se nahin marta hai wo

kaun kahta hai ki 'beKHud' mar gae

nam la-fani wo paida kar gae

thak gae the umr bhar ke kaam se

so rahe hain qabr mein aaram se