mashwara

ātish-e-be-sūd meñ mat kuud ho kar be-ḳhatar

mat gañvā yuuñ muft meñ āzādī-e-qalb-o-jigar

jab tirī qismat meñ bañgla hai na gaaḌī hai na zar

ḳhāna-ābādī kā phir ye kyuuñ taraddud is qadar

aarzū terī bajā merī nasīhat hai magar

ai mare hamdam ḳhudā ke vāste shādī na kar

tere rishte-dār bhī haiñ ab tire bad-ḳhvāh dekh

kar rahe haiñ jo tujhe sub.h-o-masā gumrāh dekh

kar rahā huuñ vaqt se pahle tujhe āgāh dekh

sun na vālid kī nasīhat apnī bas tanḳhvāh dekh

chand sau meñ zindagī hogī bhalā kaise basar

ai mire hamdam ḳhudā ke vāste shādī na kar

tū ne shādī kī to miT jā.egā terā bāñkpan

tū jhukā jab ġhair ke aage na tan terā na man

kar na yuuñ barbād apnī zindagānī kā chaman

tū agar merā nahīñ bantā na ban apnā to ban

ye tire jiine ke din haiñ is liye hargiz na mar

ai mire hamdam ḳhudā ke vāste shādī na kar

aa rahā hai roz lailā-e-girānī pur-shabāb

tel khāte haiñ jo kal tak dekhte the ghī ke ḳhvāb

aam kapḌā mushkiloñ se ho rahā hai dastiyāb

shahr meñ chīnī bhī miltī hai to sone ke hisāb

ye girānī toḌ degī ye tirī dublī kamar

ai mire hamdam ḳhudā ke vāste shādī na kar

qaum ābādī se pahle ho chukī hai zer-e-bār

aur mat kar is bichārī ko izāfe kā shikār

iltavā meñ Daal de filhāl shādī kā ġhubār

is se behtar hai ki kar le murġhiyoñ kā kārobār

varna biivī ke samar meñ to haiñ poshīda sharar

ai mire hamdam ḳhudā ke vāste shādī na kar

pesh aate haiñ jo bāhar hukmarānoñ kī tarah

guftugū karte haiñ jo rustam zamānoñ kī tarah

ghar meñ rahte haiñ magar vo be-zabānoñ kī tarah

kāTte haiñ vaqt apnā nīm-jānoñ kī tarah

sāmne begam ke un kī har baḌā.ī be-asar

ai mare hamdam ḳhudā ke vāste shādī na kar

sāmne tere hai vo sāloñ se raanā kī misāl

baa'd shādī kyā huā hai chaudharī-sāhab kā haal

ban ga.ī hai shaiḳh-jī ke vāste shādī vabāl

aur yahī janjāl hai mire liye vaj.h-e-zavāl

Daal ham bad-baḳht insānoñ pe ibrat kī nazar

ai mire hamdam ḳhudā ke vāste shādī na kar

ghar meñ jab aatī hai to ḳhūñḳhār ban jaatī hai ye

ik mujassam sho.ala-e-paikār ban jaatī hai ye

sang bantī hai kabhī talvār ban jaatī hai ye

aadmī mazdūr aur ḳharkār ban jaatī hai ye

al-amān-o-al-ġhayās-o-al-hafīz-o-al-hazar

ai mire hamdam ḳhudā ke vāste shādī na kar

aatish-e-be-sud mein mat kud ho kar be-KHatar

mat ganwa yun muft mein aazadi-e-qalb-o-jigar

jab teri qismat mein bangla hai na gaDi hai na zar

KHana-abaadi ka phir ye kyun taraddud is qadar

aarzu teri baja meri nasihat hai magar

ai mare hamdam KHuda ke waste shadi na kar

tere rishte-dar bhi hain ab tere bad-KHwah dekh

kar rahe hain jo tujhe subh-o-masa gumrah dekh

kar raha hun waqt se pahle tujhe aagah dekh

sun na walid ki nasihat apni bas tanKHwah dekh

chand sau mein zindagi hogi bhala kaise basar

ai mere hamdam KHuda ke waste shadi na kar

tu ne shadi ki to miT jaega tera bankpan

tu jhuka jab ghair ke aage na tan tera na man

kar na yun barbaad apni zindagani ka chaman

tu agar mera nahin banta na ban apna to ban

ye tere jine ke din hain is liye hargiz na mar

ai mere hamdam KHuda ke waste shadi na kar

aa raha hai roz laila-e-girani pur-shabab

tel khate hain jo kal tak dekhte the ghi ke KHwab

aam kapDa mushkilon se ho raha hai dastiyab

shahr mein chini bhi milti hai to sone ke hisab

ye girani toD degi ye teri dubli kamar

ai mere hamdam KHuda ke waste shadi na kar

qaum aabaadi se pahle ho chuki hai zer-e-bar

aur mat kar is bichaari ko izafe ka shikar

iltawa mein Dal de filhaal shadi ka ghubar

is se behtar hai ki kar le murghiyon ka karobar

warna biwi ke samar mein to hain poshida sharar

ai mere hamdam KHuda ke waste shadi na kar

pesh aate hain jo bahar hukmaranon ki tarah

guftugu karte hain jo rustam zamanon ki tarah

ghar mein rahte hain magar wo be-zabanon ki tarah

kaTte hain waqt apna nim-jaanon ki tarah

samne begam ke un ki har baDai be-asar

ai mare hamdam KHuda ke waste shadi na kar

samne tere hai wo salon se rana ki misal

ba'd shadi kya hua hai chaudhari-sahab ka haal

ban gai hai shaiKH-ji ke waste shadi wabaal

aur yahi janjal hai mere liye wajh-e-zawal

Dal hum bad-baKHt insanon pe ibrat ki nazar

ai mere hamdam KHuda ke waste shadi na kar

ghar mein jab aati hai to KHunKHar ban jati hai ye

ek mujassam shoala-e-paikar ban jati hai ye

sang banti hai kabhi talwar ban jati hai ye

aadmi mazdur aur KHarkar ban jati hai ye

al-aman-o-al-ghayas-o-al-hafiz-o-al-hazar

ai mere hamdam KHuda ke waste shadi na kar