mashwara

merī mahbūb ye tauhīn-e-mohabbat hogī

bevafā kah ke mire pyaar ko majrūh na kar

tujh ko shikva hai shikāyat hai gila hai mujh se

merī qismat kī tarah tū bhī ḳhafā hai mujh se

terī har baat hai taslīm

magar kahne de

daur-e-sarmāya kī

roñdī huī ik laash ham

zulm kī aag meñ

ma.asūm mohabbat jhulse

is se behtar hai ki

begāna banā leñ ḳhud ko

lafz-dar-lafz

hikāyāt meñ kho jaa.eñ ham

kapkapāte hue hoñToñ pe tabassum rakh leñ

TimTimātī huī āñkhoñ meñ tajallī bhar leñ

asr-e-hāzir kā

taqāzā bhī yahī hai hamdam

apnī begāngī ko

apnā muqaddar samjheñ

tū muqaddas hai

tire gird taqaddus kā hisār

maiñ ki

is ahd kā

ik shā.er-e-āshufta-e-mizāj

mere hisse meñ

faqat

nazm ġhazal aur ash.ār

maiñ bahar-hāl

tire shauq kā sāmān nahīñ

merī āñkhoñ meñ haiñ TuuTe hue

lafzoñ ke nuqūsh

mere hoñToñ pe haiñ

bikhre hue maazī ke hurūf

sach to ye hai ki mirā tujh se koī mel nahīñ

ishq me.arāj-e-muqaddar hai koī khel nahīñ

meri mahbub ye tauhin-e-mohabbat hogi

bewafa kah ke mere pyar ko majruh na kar

tujh ko shikwa hai shikayat hai gila hai mujh se

meri qismat ki tarah tu bhi KHafa hai mujh se

teri har baat hai taslim

magar kahne de

daur-e-sarmaya ki

rondi hui ek lash hum

zulm ki aag mein

masum mohabbat jhulse

is se behtar hai ki

begana bana len KHud ko

lafz-dar-lafz

hikayat mein kho jaen hum

kapkapate hue honTon pe tabassum rakh len

TimTimati hui aankhon mein tajalli bhar len

asr-e-hazir ka

taqaza bhi yahi hai hamdam

apni begangi ko

apna muqaddar samjhen

tu muqaddas hai

tere gird taqaddus ka hisar

main ki

is ahd ka

ek shaer-e-ashufta-e-mizaj

mere hisse mein

faqat

nazm ghazal aur ashaar

main bahar-haal

tere shauq ka saman nahin

meri aankhon mein hain TuTe hue

lafzon ke nuqush

mere honTon pe hain

bikhre hue mazi ke huruf

sach to ye hai ki mera tujh se koi mel nahin

ishq mearaj-e-muqaddar hai koi khel nahin