mashwara

tū chhin gayā to lagā jaise

lakīreñ merī hathelī ke kāġhaz se gir ga.ī haiñ

aur haath kafan se zyāda

safed ho ga.e haiñ

ab jaane kaun se lamhe kī pur-kār

lā.inoñ kī ibārat dobāra likhe

maiñ ne jiit udhār to nahīñ māñgī thī

hijr kisī zālim chaudharī kī tarah

tamām vasl kā anaaj uThā kar le gayā hai

aur bhuuk jism pe bāloñ kī tarah ugne lagī hai

vaqt se merā mazāq kabhī nahīñ rahā

phir jaane kyuuñ

sab ye mujh se kisī bahut qarībī dost kī tarah

kheltā rahtā hai

tere aañsū merī āñkhoñ ko

nargis kā sauñp kar ga.e haiñ

jaane surḳh gulāb kā zā.iqa bīnā.ī kab chakkhe

suno

raste abhī apne musāfir bhūle nahīñ

lauT aao

varna ma.alūm hai tumheñ

ab nayā ghar bante der nahīñ lagtī

raste sukḌī huī kaliyāñ

aur khet sahn banñe se pahle chale aao

ki tavīl dūriyāñ

apne mehvar se ha.Tne ke mutarādif haiñ

aur madār se nikle hue chāñd

ek din aḳhbār kī surḳhī ban kar

baaqī raddī ke bhaav bikte haiñ

tu chhin gaya to laga jaise

lakiren meri hatheli ke kaghaz se gir gai hain

aur hath kafan se zyaada

safed ho gae hain

ab jaane kaun se lamhe ki pur-kar

lainon ki ibarat dobara likhe

main ne jit udhaar to nahin mangi thi

hijr kisi zalim chaudhari ki tarah

tamam wasl ka anaj uTha kar le gaya hai

aur bhuk jism pe baalon ki tarah ugne lagi hai

waqt se mera mazaq kabhi nahin raha

phir jaane kyun

sab ye mujh se kisi bahut qaribi dost ki tarah

khelta rahta hai

tere aansu meri aankhon ko

nargis ka saunp kar gae hain

jaane surKH gulab ka zaiqa binai kab chakkhe

suno

raste abhi apne musafir bhule nahin

lauT aao

warna malum hai tumhein

ab naya ghar bante der nahin lagti

raste sukDi hui kaliyan

aur khet sahn banne se pahle chale aao

ki tawil duriyan

apne mehwar se haTne ke mutaradif hain

aur madar se nikle hue chand

ek din aKHbar ki surKHi ban kar

baqi raddi ke bhaw bikte hain