مشورہ

تم سر شاخ سمن باغ میں آیا نہ کرو

باغ میں منچلے بھنورے بھی اڑا کرتے ہیں

وہ ہدف تم کو بنا لیں گے تو پھر کیا ہوگا

بار بار آئنے کے پاس بھی جایا نہ کرو

بعض آئینے بھی جاں دار ہوا کرتے ہیں

وہ جو سینے سے لگا لیں گے تو پھر کیا ہوگا

تم کھلی چھت پہ شب ماہ میں گایا نہ کرو

رات میں چند فرشتے بھی پھرا کرتے ہیں

وہ اگر ساز اٹھا لیں گے تو پھر کیا ہوگا

اپنی سکھیوں کو بھی ہر خواب سنایا نہ کرو

ان کی آنکھوں میں بھی کچھ خواب بسا کرتے ہیں

خواب سے خواب مزا لیں گے تو پھر کیا ہوگا

میرے احباب سے بھی ہاتھ ملایا نہ کرو

آستینوں میں بھی کچھ سانپ پلا کرتے ہیں

اپنا سر گر وہ اٹھا لیں گے تو پھر کیا ہوگا