masKHara pareshan hai

nokīlī 'imāratoñ kī khiḌkiyāñ khulī haiñ

shā.eqīn bechain haiñ

maut kā khel kab shurū' hogā

superman kī garaj-dār āvāz kī lahreñ

jab masḳhare kā badan chīrne lagīñ

to tāliyāñ bajīñ

lutf-andoz hote hue shā.eqīn

tanziya fiqre bhī kas rahe the

masḳhara pareshāñ thā

tāliyoñ aur gāliyoñ ke biich

ring-master speaker kā volume tez karte hue bolā

hazrāt

apnī ‘izzateñ apnī jeb meñ rakhiye

ham nasl-dar-nasl ġhulām haiñ

hameñ patā hī nahīñ mehmān kise kahte haiñ

aur hamāre be-mās jism pe qahqahe mat māriye

jahān bhar ke tajrabe ham par hue haiñ

hamārā badan azal se laboratory rahā hai

nokili 'imaraton ki khiDkiyan khuli hain

shaeqin bechain hain

maut ka khel kab shuru' hoga

superman ki garaj-dar aawaz ki lahren

jab masKHare ka badan chirne lagin

to taliyan bajin

lutf-andoz hote hue shaeqin

tanziya fiqre bhi kas rahe the

masKHara pareshan tha

taliyon aur galiyon ke bich

ring-master speaker ka wolume tez karte hue bola

hazraat

apni ‘izzaten apni jeb mein rakhiye

hum nasl-dar-nasl ghulam hain

hamein pata hi nahin mehman kise kahte hain

aur hamare be-mas jism pe qahqahe mat mariye

jahan bhar ke tajrabe hum par hue hain

hamara badan azal se laboratory raha hai