masKHara ghoDa

ek thā ghoḌā ajab nirālā

bāteñ havā se karne vaalā

rang us kā chitkabrā aisā

sāvan maas ke bādal jaisā

qad thā us kā yuuñ to chhoTā

jism thā lekin ḳhāsā moTā

circus meñ kartab dikhlātā

chhoTe baḌoñ ko ḳhuub hañsātā

uchhlā kuudā nāchā kartā

aur havā meñ tarāre bhartā

ik din circus meñ chhuTTī thī

ghoḌe ko bas sair kī sūjhī

circus se vo bāhar niklā

aur phir ik maidān meñ pahuñchā

vaañ laḌke DañD pel rahe the

geñd se bhī kuchh khel rahe the

ghoḌe ko ye khel jo bhāyā

dil meñ us ke josh sā aayā

us ne kahā ai bhaa.ī laḌko

khel meñ mujh ko shāmil kar lo

laḌke bole achchhā aao

tum bhī khaḌe ik jā ho jaao

laḌke the go sab hī khilāḌī

ghoḌā bhī thā koī anāḌī

haath se geñd dabocheñ laḌke

ghoḌā muñh se geñd daboche

khel ne aisā rang jamāyā

sab ne ḳhuub hī lutf uThāyā

ab tum baat suno aage kī

geñd aa.ī ik baar uchhaltī

ghoḌe kī aa.ī kam-baḳhtī

us ne jhāḌī ik dolattī

geñd pakaḌne phir vo lapkā

aisā lagā kuchh us ko dhakkā

geñd vo us ke halq se utrī

aur bas sīdhī peT meñ pahuñchī

jaan pe us kī aisī ga.ī ban

bhuul gayā vo sab apne fan

uchhlā kuudā shor machāyā

ghoḌe ko ārām na aayā

laḌke us ko jaise-taise

le ke shifā ḳhāne meñ pahuñche

dauḌā dauḌā aayā surgeon

karnā thā jis ko operation

ghoḌe kā thā haal jo abtar

jhaT se nikālā us ne nashtar

ghoḌe ke jab peT ko chīrā

andar se ik mālTā niklā

ek tha ghoDa ajab nirala

baaten hawa se karne wala

rang us ka chitkabra aisa

sawan mas ke baadal jaisa

qad tha us ka yun to chhoTa

jism tha lekin KHasa moTa

circus mein kartab dikhlata

chhoTe baDon ko KHub hansata

uchhla kuda nacha karta

aur hawa mein tarare bharta

ek din circus mein chhuTTi thi

ghoDe ko bas sair ki sujhi

circus se wo bahar nikla

aur phir ek maidan mein pahuncha

wan laDke DanD pel rahe the

gend se bhi kuchh khel rahe the

ghoDe ko ye khel jo bhaya

dil mein us ke josh sa aaya

us ne kaha ai bhai laDko

khel mein mujh ko shamil kar lo

laDke bole achchha aao

tum bhi khaDe ek ja ho jao

laDke the go sab hi khilaDi

ghoDa bhi tha koi anaDi

hath se gend dabochen laDke

ghoDa munh se gend daboche

khel ne aisa rang jamaya

sab ne KHub hi lutf uThaya

ab tum baat suno aage ki

gend aai ek bar uchhalti

ghoDe ki aai kam-baKHti

us ne jhaDi ek dolatti

gend pakaDne phir wo lapka

aisa laga kuchh us ko dhakka

gend wo us ke halq se utri

aur bas sidhi peT mein pahunchi

jaan pe us ki aisi gai ban

bhul gaya wo sab apne fan

uchhla kuda shor machaya

ghoDe ko aaram na aaya

laDke us ko jaise-taise

le ke shifa KHane mein pahunche

dauDa dauDa aaya surgeon

karna tha jis ko operation

ghoDe ka tha haal jo abtar

jhaT se nikala us ne nashtar

ghoDe ke jab peT ko chira

andar se ek malTa nikla