maslahat

chāñdnī raat ke hañste hue ḳhvāboñ kī tarah

nuqra.ī jism kā shādāb gulistāñ le kar

shoḳh āñkhoñ ke chhalakte hue paimānoñ meñ

mujh tahī-dast ke ālām kā darmāñ le kar

aaj tū jin ko bujhāne ke liye aa.ī hai

unhīñ sho.aloñ se mire dil ne jilā paa.ī hai

unhīñ sho.aloñ kī tab-o-tāb hai jis ne ab tak

mere idrāk ko be-soz nahīñ rakkhā hai

jabr kī chhāñv meñ parvān chaḌhā huuñ phir bhī

maiñ ne insān kī azmat pe yaqīñ rakkhā hai

aise sho.aloñ kī tapish terī panāhoñ meñ kahāñ

aur ye soz-e-yaqīñ terī nigāhoñ meñ kahāñ

unhīñ sho.aloñ kī tamāzat kā sahārā le kar

barbariyyat ke har aivān se Takrāyā huuñ

har kaḌe vaqt meñ sañgīn chaTānoñ kī tarah

tund hālāt ke tūfān se Takrāyā huuñ

tū kahāñ aur mirī jur.at-e-be-bāk kahāñ

tujh ko is kāhish-e-jāñ-soz kā idrāk kahāñ

ab yahī sho.ale mirī fikr-o-nazar meñ Dhal kar

husn-e-ehsās kā shahkār nazar aate haiñ

is tamaddun kī ghanī raat ke sannāTe meñ

sub.h kī tarah ziyā-bār nazar aate haiñ

aur tū kahtī hai is subah kā saudā kar luuñ

dil meñ in sho.aloñ ke badle tire jalve bhar luuñ

jab bhaḌak uTTheñge har sard-o-siyah siine meñ

yahī sho.ale dil-e-āfāq ko lau baḳhsheñge

tīra-o-tār dimāġhoñ ko bujhe chehroñ ko

azm-o-ummīd kī gaatī huī zau baḳhsheñge

aur ye zau hī banegī tire jalvoñ kā kafan

aag ho jā.egā is se tirā shādāb-e-chaman

mere ālām kā darmāñ tirī āñkhoñ meñ nahīñ

apne ehsās ko siine meñ tapāñ rakkhūñgā

aaj tak maiñ ne jise shola-fishāñ rakkhā hai

ab bhī vo aag yūñhī shola-fishāñ rakkhūñgā

mujh ko ehsās hai lekin tujhe ehsās nahīñ

tere dāman kī havā mere liye raas nahīñ

chandni raat ke hanste hue KHwabon ki tarah

nuqrai jism ka shadab gulistan le kar

shoKH aankhon ke chhalakte hue paimanon mein

mujh tahi-dast ke aalam ka darman le kar

aaj tu jin ko bujhane ke liye aai hai

unhin shoalon se mere dil ne jila pai hai

unhin shoalon ki tab-o-tab hai jis ne ab tak

mere idrak ko be-soz nahin rakkha hai

jabr ki chhanw mein parwan chaDha hun phir bhi

main ne insan ki azmat pe yaqin rakkha hai

aise shoalon ki tapish teri panahon mein kahan

aur ye soz-e-yaqin teri nigahon mein kahan

unhin shoalon ki tamazat ka sahaara le kar

barbariyyat ke har aiwan se Takraya hun

har kaDe waqt mein sangin chaTanon ki tarah

tund haalat ke tufan se Takraya hun

tu kahan aur meri jurat-e-be-bak kahan

tujh ko is kahish-e-jaan-soz ka idrak kahan

ab yahi shoale meri fikr-o-nazar mein Dhal kar

husn-e-ehsas ka shahkar nazar aate hain

is tamaddun ki ghani raat ke sannaTe mein

subh ki tarah ziya-bar nazar aate hain

aur tu kahti hai is subah ka sauda kar lun

dil mein in shoalon ke badle tere jalwe bhar lun

jab bhaDak uTThenge har sard-o-siyah sine mein

yahi shoale dil-e-afaq ko lau baKHshenge

tira-o-tar dimaghon ko bujhe chehron ko

azm-o-ummid ki gati hui zau baKHshenge

aur ye zau hi banegi tere jalwon ka kafan

aag ho jaega is se tera shadab-e-chaman

mere aalam ka darman teri aankhon mein nahin

apne ehsas ko sine mein tapan rakkhunga

aaj tak main ne jise shola-fishan rakkha hai

ab bhi wo aag yunhi shola-fishan rakkhunga

mujh ko ehsas hai lekin tujhe ehsas nahin

tere daman ki hawa mere liye ras nahin