mataa-e-sher

maiñ us ko dekhūñ to jaage shu.ūr-e-ḳhvābīda

maiñ us ko sochūñ to phūTe ufuq pe sub.h kī pau

ridā-e-shab ko sameTe kiran tamanna kī

rah-e-hayāt se zulmat kā kārvāñ haT jaa.e

sanam-kada vo mohabbat kā us kī devī bhī

maiñ us ko husn likhūñ husn kī kitāb likhūñ

kañval tarāshūñ ki chehre ko ik gulāb likhūñ

shabīh-e-fikr likhūñ paikar-e-ḳhayāl likhūñ

matā.a-e-sher likhūñ sher kā jamāl likhūñ

sulūk lahje kā us ke ki jaise amrit-ras

vo jāñ-farebī-e-iz.hār-e-dil-navāz-e-suḳhan

jabīñ pe vus.at-e-qalb-o-nazar kī tahrīreñ

hadīs-e-mehr-o-vafā kī hasīn tafsīreñ

ġhurūr-e-ishq un āñkhoñ kā ehtirām kare

vo āsmāñ hai zamīñ us se kyā kalām kare

main us ko dekhun to jage shuur-e-KHwabida

main us ko sochun to phuTe ufuq pe subh ki pau

rida-e-shab ko sameTe kiran tamanna ki

rah-e-hayat se zulmat ka karwan haT jae

sanam-kada wo mohabbat ka us ki dewi bhi

main us ko husn likhun husn ki kitab likhun

kanwal tarashun ki chehre ko ek gulab likhun

shabih-e-fikr likhun paikar-e-KHayal likhun

mataa-e-sher likhun sher ka jamal likhun

suluk lahje ka us ke ki jaise amrit-ras

wo jaan-farebi-e-izhaar-e-dil-nawaz-e-suKHan

jabin pe wusat-e-qalb-o-nazar ki tahriren

hadis-e-mehr-o-wafa ki hasin tafsiren

ghurur-e-ishq un aankhon ka ehtiram kare

wo aasman hai zamin us se kya kalam kare