maulana abul-kalam ka janaza dekh kar

kis ko le kar jā rahe haiñ aaj yuuñ nauha-kunāñ

ro rahe haiñ aaj kis ko mulk ke pīr-o-javāñ

sar-nigūñ kis ke liye hai hind kā qaumī nishāñ

na.ash se lipTā hai kis kī parcham-e-hindostāñ

kis liye hai aaj sīna-chāk dillī kī zamīñ

hind kā ye dil banegā kis amānat kā amiiñ

vo imām-ul-hind vo mard-e-ḳhudā ruḳhsat huā

jang-e-āzādī kā apnī peshvā ruḳhsat huā

rahnumāoñ kā hamāre rahnumā ruḳhsat huā

dil pe kartī thī asar jis kī sadā ruḳhsat huā

saat din pahle bhī thā taqrīr meñ kitnā asar

tūtī-e-hindostāñ ko khā ga.ī kis kī nazar

ye zamīn-e-hind hai is meñ bahut hoñge adiib

is kī miTTī meñ mohabbat hai bahut hoñge habīb

gā.eñge hubb-e-vatan ke raag lākhoñ andalīb

aur mil jā.eñge amrāz-e-siyāsat ke tabīb

ek hastī meñ tamām ausāf kyūñkar pā.eñge

ab kahāñ se bul-kalām-āzād jaisā lā.eñge

zindagī meñ marne vaale kī koī paiġhām hai

be-ġharaz be-laus ḳhidmat kī salā-e-ām hai

nekiyoñ kā āqibat meñ nek hī anjām hai

hai yahī insāniyat baaqī ḳhudā kā naam hai

ai 'shifā' insān vo hai jo ho mar kar nek-nām

zindagī meñ to sabhī rakhte haiñ ḳhud ko shād-kām

kis ko le kar ja rahe hain aaj yun nauha-kunan

ro rahe hain aaj kis ko mulk ke pir-o-jawan

sar-nigun kis ke liye hai hind ka qaumi nishan

nash se lipTa hai kis ki parcham-e-hindostan

kis liye hai aaj sina-chaak dilli ki zamin

hind ka ye dil banega kis amanat ka amin

wo imam-ul-hind wo mard-e-KHuda ruKHsat hua

jang-e-azadi ka apni peshwa ruKHsat hua

rahnumaon ka hamare rahnuma ruKHsat hua

dil pe karti thi asar jis ki sada ruKHsat hua

sat din pahle bhi tha taqrir mein kitna asar

tuti-e-hindostan ko kha gai kis ki nazar

ye zamin-e-hind hai is mein bahut honge adib

is ki miTTi mein mohabbat hai bahut honge habib

gaenge hubb-e-watan ke rag lakhon andalib

aur mil jaenge amraaz-e-siyasat ke tabib

ek hasti mein tamam ausaf kyunkar paenge

ab kahan se bul-kalam-azad jaisa laenge

zindagi mein marne wale ki koi paigham hai

be-gharaz be-laus KHidmat ki sala-e-am hai

nekiyon ka aaqibat mein nek hi anjam hai

hai yahi insaniyat baqi KHuda ka nam hai

ai 'shifa' insan wo hai jo ho mar kar nek-nam

zindagi mein to sabhi rakhte hain KHud ko shad-kaam