maulwi jannat mein

maulvī jannat meñ pahoñche to ajab the silsile

nāshte meñ sub.h ko bas chaa.e aur paape mile

jhāñk kar dekhā jahannum meñ to ye aaya nazar

degeñ hī degeñ khanaktī thiiñ jidhar dekho udhar

taish meñ aakar farishtoñ se kiyā tab yuuñ ḳhitāb

zindagī bhar kī riyāzat kā sila ye hai janāb

ham to duniyā meñ bhī rūkhī sūkhī khā kar hī jiye

ne.amatoñ kī bārisheñ thī sirf ġhairoñ ke liye

ik sharābī kī lahad par raat bhar hanDe jale

bar mazār-e-mā ġharībāñ nai charāġhe nai gule

sun ke ye un ko farishtoñ ne diyā tab yuuñ javāb

aap kā shikva to sar āñkhoñ pe hai aalī janāb

ham haiñ supply zarūrat ke mutābiq de rahe

chaar bandoñ ke liye degeñ chaḌhāne se rahe

us kī rahmat se ye jannat jaise hī bhar jā.egī

har taraf degeñ khanakne kī sadā tab aa.egī

maulwi jannat mein pahonche to ajab the silsile

nashte mein subh ko bas chae aur pape mile

jhank kar dekha jahannum mein to ye aaya nazar

degen hi degen khanakti thin jidhar dekho udhar

taish mein aakar farishton se kiya tab yun KHitab

zindagi bhar ki riyazat ka sila ye hai janab

hum to duniya mein bhi rukhi sukhi kha kar hi jiye

neamaton ki barishen thi sirf ghairon ke liye

ek sharabi ki lahad par raat bhar hanDe jale

bar mazar-e-ma ghariban nai charaghe nai gule

sun ke ye un ko farishton ne diya tab yun jawab

aap ka shikwa to sar aankhon pe hai aali janab

hum hain supply zarurat ke mutabiq de rahe

chaar bandon ke liye degen chaDhane se rahe

us ki rahmat se ye jannat jaise hi bhar jaegi

har taraf degen khanakne ki sada tab aaegi