mausam

bhīge bhīge mausam meñ vo

tīkhe naqsh aur nainoñ vaalī

ik laḌkī sharmīlī sī

chhat par aatī jaatī apne āñchal ko lahrātī thī

hañste hañste bārish meñ vo bhīgī zulfeñ phailā kar

jaise rang uḌātī thī

phir siñghār kī mez pe vo

pahroñ apnī raushan raushan āñkheñ taktī

dāñtoñ meñ phir hoñT dabā kar itrātī aur

ḳhud se hī sharmātī thī

nazmeñ likhtī ġhazleñ kahtī

giile baal sukhātī thī

itne achchhe bhīge bhīge mausam meñ ab

us kā apnī chhat par aanā bantā hai

hañste hañste bārish meñ ab rang uḌānā bantā hai

dāñtoñ meñ phir hoñT dabā kar

itrānā bhī aur sharmānā bantā hai

lekin ab

vo siñghār kī Table par

apnī bhīgī bhīgī āñkheñ pahroñ taktī rahtī hai

nazmeñ sochtī rahtī hai aur

ġhazleñ kahtī rahtī hai

haath kī rekhāoñ se ulajh kar

apne hoñT

miich ke āñkheñ dhīre dhīre apne ashk bahātī hai

ā.īne ke sāmne baiThī bhīge ḳhvāb sukhātī hai

bhige bhige mausam mein wo

tikhe naqsh aur nainon wali

ek laDki sharmili si

chhat par aati jati apne aanchal ko lahraati thi

hanste hanste barish mein wo bhigi zulfen phaila kar

jaise rang uDati thi

phir singhaar ki mez pe wo

pahron apni raushan raushan aankhen takti

danton mein phir honT daba kar itraati aur

KHud se hi sharmati thi

nazmen likhti ghazlen kahti

gile baal sukhati thi

itne achchhe bhige bhige mausam mein ab

us ka apni chhat par aana banta hai

hanste hanste barish mein ab rang uDana banta hai

danton mein phir honT daba kar

itrana bhi aur sharmana banta hai

lekin ab

wo singhaar ki Table par

apni bhigi bhigi aankhen pahron takti rahti hai

nazmen sochti rahti hai aur

ghazlen kahti rahti hai

hath ki rekhaon se ulajh kar

apne honT

mich ke aankhen dhire dhire apne ashk bahati hai

aaine ke samne baiThi bhige KHwab sukhati hai