maut ki justuju

chehre rūhoñ kī be-mā.egī

zehn kī tīrgī ke siyah aa.ine

sard ā.ankhoñ ke tārīk rauzan meñ dubkā huā ik ḳhalā

ek sannāTā hoñToñ ke basta makāñ meñ hai soyā huā

ruuh ko jehd-e-tahsīl-e-zar khā ga.ī

zehn kī raushnī nā-ummīdī kī zulmat meñ dhundlā ga.ī

āñkheñ nākāmiyoñ ke khañDar meñ makāñ ke tasavvur se aarī huiiñ

hoñT kashkol daryūza-gar ban ke lafzoñ ke ismat kī dūkāñ bane

aur ab kuchh nahīñ

aur ab kuchh nahīñ

ek dīvāna gar ḳhvāhish-e-zīst hai

ḳhāl-o-ḳhat dast-o-pā

sīna-o-sar shikam aur zer-e-shikam

ek dīvāna gar ḳhvāhish-e-zīst a.azā meñ dauḌī huī

ek be-ma.anī bekār apāhij havas-e-jism ke tāne-bāne ko thāme hue

sirf us ek lamhe kī aamad kā hai intizār

jab ki zehnoñ ke rūhoñ ke aa.ine

ā.ankhoñ meñ dubkā ḳhat

aur hoñToñ se lipTā sukūt

ek baar ḳhvāhish-e-zīst se kah sakeñ

ziist ham par hamesha se ilzām hai

ham na zinda rahe haiñ kabhī aur na zinda haiñ ab

ek dīvāna-gar ḳhvāhish-e-marg hī thī hamāre liye zindagī

chehre ruhon ki be-maegi

zehn ki tirgi ke siyah aaine

sard aaankhon ke tarik rauzan mein dubka hua ek KHala

ek sannaTa honTon ke basta makan mein hai soya hua

ruh ko jehd-e-tahsil-e-zar kha gai

zehn ki raushni na-ummidi ki zulmat mein dhundla gai

aankhen nakaamiyon ke khanDar mein makan ke tasawwur se aari huin

honT kashkol daryuza-gar ban ke lafzon ke ismat ki dukan bane

aur ab kuchh nahin

aur ab kuchh nahin

ek diwana gar KHwahish-e-zist hai

KHal-o-KHat dast-o-pa

sina-o-sar shikam aur zer-e-shikam

ek diwana gar KHwahish-e-zist aaza mein dauDi hui

ek be-mani bekar apahij hawas-e-jism ke tane-bane ko thame hue

sirf us ek lamhe ki aamad ka hai intizar

jab ki zehnon ke ruhon ke aaine

aaankhon mein dubka KHat

aur honTon se lipTa sukut

ek bar KHwahish-e-zist se kah saken

zist hum par hamesha se ilzam hai

hum na zinda rahe hain kabhi aur na zinda hain ab

ek diwana-gar KHwahish-e-marg hi thi hamare liye zindagi