maut meri sakhi

maut merī sakhī

mere hī sañg āñgan meñ khelī baḌhī

merī poshāk mere dupaTTe pe vo apne hī pyāre hāthoñ se

chāñd aur taare ugātī rahī

zindagānī se mujh ko laḌātī rahī

maut merī sakhī

mere hī sañg khāne ke luqme bhare

maiñ bharī chāñd rātoñ meñ miTTī kī korī surāhī se

paanī pilātī rahī

sardiyoñ kī ThiThurtī siyāh raat meñ

aur safede se labrez kohre bhare

din ko apne khule bāzuoñ meñ bulātī rahī

maut merī sakhī

merī tanhā.iyoñ kī kaḌī dhuup meñ

chhāñv ban kar mire saath chaltī rahī

maut merī sakhī merī nabzoñ kī vo rāzdāñ

mere āñsuoñ kī sab āhaTeñ is ke hāthoñ se likkhī ga.iiñ

nafratoñ aur mohabbat kī sab parchiyāñ mere dāman meñ girtī rahīñ

maut merī sakhī un ko chuntī rahī

aaj merī sakhī maut merī sakhī

mujh se hī ruuTh ke mere ghar se chalī

maiñ vidā.ī ke sab giit hoñToñ meñ bhīñche

use dekhtī hī rahī

mujhe chhoḌ kar yuuñ na jaao

tumhāre binā mere āñgan kā tanhā shajar

sūkhte sūkhte ek din is zamīn par bikhar jā.egā

aur ma.asūm chiḌiyāñ binā maut mar jā.eñgī

zindagī se jo naatā hai kaT jā.egā

maut merī sakhī

aao phir mujh ko oḌho mujhe pahan lo

aao phir mujh ko apne gale se lagā lo

mohabbat se phir āsmāñ par uThā lo

chalī aao merī sakhī

maut merī sakhī

maut meri sakhi

mere hi sang aangan mein kheli baDhi

meri poshak mere dupaTTe pe wo apne hi pyare hathon se

chand aur tare ugati rahi

zindagani se mujh ko laDati rahi

maut meri sakhi

mere hi sang khane ke luqme bhare

main bhari chand raaton mein miTTi ki kori surahi se

pani pilati rahi

sardiyon ki ThiThurti siyah raat mein

aur safede se labrez kohre bhare

din ko apne khule bazuon mein bulati rahi

maut meri sakhi

meri tanhaiyon ki kaDi dhup mein

chhanw ban kar mere sath chalti rahi

maut meri sakhi meri nabzon ki wo raazdan

mere aansuon ki sab aahaTen is ke hathon se likkhi gain

nafraton aur mohabbat ki sab parchiyan mere daman mein girti rahin

maut meri sakhi un ko chunti rahi

aaj meri sakhi maut meri sakhi

mujh se hi ruTh ke mere ghar se chali

main widai ke sab git honTon mein bhinche

use dekhti hi rahi

mujhe chhoD kar yun na jao

tumhaare bina mere aangan ka tanha shajar

sukhte sukhte ek din is zamin par bikhar jaega

aur masum chiDiyan bina maut mar jaengi

zindagi se jo nata hai kaT jaega

maut meri sakhi

aao phir mujh ko oDho mujhe pahan lo

aao phir mujh ko apne gale se laga lo

mohabbat se phir aasman par uTha lo

chali aao meri sakhi

maut meri sakhi