maut mujh par bar-haq nahin

maiñ marne ke liye paidā nahīñ huā

mujh par kisī qism kā hamla

us muāhide kī ḳhilāf-varzī hogī

jis par ek ġhaibī haath aur maiñ ne

dastaḳhat kiye the

aur jis kī rū se

maut mujh par bar-haq nahīñ Thahrī thī

zinda rahnā ab merā dard-e-sar nahīñ

maiñ ye farīza

tārīḳh ko sauñp chukā huuñ

tārīḳh jo merī ragoñ meñ

zahr kī sūrat dāḳhil huī

aur ab amrit ban kar

mere masāmoñ se

qatra qatra Tapak rahī hai

maut se merī koī shanāsā.ī nahīñ

maiñ us se darḳhvāst karūñgā

vo mere ḳhilāf

kisī sāzish meñ sharīk na ho

ki mere paas

muāhide kī jo naql mahfūz hai

us par us ke dastaḳhat

ba-taur-e-gavāh maujūd haiñ

main marne ke liye paida nahin hua

mujh par kisi qism ka hamla

us muahide ki KHilaf-warzi hogi

jis par ek ghaibi hath aur main ne

dastaKHat kiye the

aur jis ki ru se

maut mujh par bar-haq nahin Thahri thi

zinda rahna ab mera dard-e-sar nahin

main ye fariza

tariKH ko saunp chuka hun

tariKH jo meri ragon mein

zahr ki surat daKHil hui

aur ab amrit ban kar

mere masamon se

qatra qatra Tapak rahi hai

maut se meri koi shanasai nahin

main us se darKHwast karunga

wo mere KHilaf

kisi sazish mein sharik na ho

ki mere pas

muahide ki jo naql mahfuz hai

us par us ke dastaKHat

ba-taur-e-gawah maujud hain