maut se maut tak

mujhe apnī maut se bahut mohabbat hai

maut zindagī kā sab se baḌā sach hai

mohabbatoñ meñ judā.ī

vasl ke baad kā koī marhala hotī hai

magar ye mohabbat rivāyatī nahīñ

yahāñ to vasl ke intizār meñ

puurī zindagī judā.ī ko daan karnā paḌtī hai

mohabbat aur tashvīsh ke ta.alluq se kis ko inkār hogā

aur maut se ziyāda tashvīsh-nāk shai aur kyā hogī

mujhe apnī maut se ishq hargiz nahīñ

ye merā junūn bhī nahīñ

sirf mohabbat hai

vasl kā lutf isī sūrat meñ aatā hai

jab vo apne muqarrara vaqt par ho

maiñ vaqt se pahle nahīñ marnā chāhtā

mujhe har us maut se shadīd nafrat hai

jo vaqt se pahle

kisī ko gale lagā letī hai

vo maut jo golī ke bārūd meñ chhup kar

haftoñ apne shikār kā pīchhā kartī hai

mujhe ek nazar nahīñ bhātī

maiñ har din us maut kā galā dabochnā chāhtā huuñ

jo log ḳhud apne halq par

aur apnī nabzoñ par tahrīr karte haiñ

mujhe vo uḌtī huī maut haftoñ khultī hai

jo kisī chhat par girne se pahle

barbād hone vaale gharoñ kī gintī

bhuul jaatī hai

mujhe ghin aatī hai jacket meñ qaid us maut se

jis ko bachche aur būḌhe kā farq nazar nahīñ aatā

jo āzād ho kar

saiñkaḌoñ sīnoñ par taqsīm ho jaatī hai

nitrogen ke nucleus meñ rakh kar

shahroñ par girā.ī jaane vaalī maut jo aane vaalī zinda nasloñ ke a.azā aur ḳhadd-o-ḳhāl se jhāñktī hai

sāloñ tak merā ḳhuun chūstī hai

mujhe apnī maut se mohabbat ke alāva

har us maut se nafrat hai

jo malak-ul-maut ke Time Table meñ nahīñ likhī huī

mujhe apni maut se bahut mohabbat hai

maut zindagi ka sab se baDa sach hai

mohabbaton mein judai

wasl ke baad ka koi marhala hoti hai

magar ye mohabbat riwayati nahin

yahan to wasl ke intizar mein

puri zindagi judai ko dan karna paDti hai

mohabbat aur tashwish ke talluq se kis ko inkar hoga

aur maut se ziyaada tashwish-nak shai aur kya hogi

mujhe apni maut se ishq hargiz nahin

ye mera junun bhi nahin

sirf mohabbat hai

wasl ka lutf isi surat mein aata hai

jab wo apne muqarrara waqt par ho

main waqt se pahle nahin marna chahta

mujhe har us maut se shadid nafrat hai

jo waqt se pahle

kisi ko gale laga leti hai

wo maut jo goli ke barud mein chhup kar

hafton apne shikar ka pichha karti hai

mujhe ek nazar nahin bhati

main har din us maut ka gala dabochna chahta hun

jo log KHud apne halq par

aur apni nabzon par tahrir karte hain

mujhe wo uDti hui maut hafton khulti hai

jo kisi chhat par girne se pahle

barbaad hone wale gharon ki ginti

bhul jati hai

mujhe ghin aati hai jacket mein qaid us maut se

jis ko bachche aur buDhe ka farq nazar nahin aata

jo aazad ho kar

sainkaDon sinon par taqsim ho jati hai

nitrogen ke nucleus mein rakh kar

shahron par girai jaane wali maut jo aane wali zinda naslon ke aaza aur KHadd-o-KHal se jhankti hai

salon tak mera KHun chusti hai

mujhe apni maut se mohabbat ke alawa

har us maut se nafrat hai

jo malak-ul-maut ke Time Table mein nahin likhi hui