mayurka

mayurka ke sāhiloñ pe kis qadar gulāb the

ki ḳhushbueñ thī be-tarah ki rañg be-hisāb the

tunuk-libāsiyāñ shanāvaroñ kī thiiñ qayāmateñ

tamām sīm-tan sharīk-e-jashn-e-shahr-e-āb the

shuā-e-mahr kī ziyā se the jigar jigar badan

qamar-jamāl jin ke aks-e-raushnī ke baab the

khulī fazā kī dhuup vo ki jism sāñvle kare

butān-e-āzarī ki mast-e-ġhusl-e-āftāb the

yahīñ pata chalā ki ziist husn hai bahār hai

yahīñ ḳhabar huī ki zindagī ke dukh sarāb the

yahīñ lagā ki gardishoñ ke zāviye badal ga.e

na roz o shab kī talḳhiyāñ na vaqt ke azaab the

mire tamām dost ajnabī rafāqatoñ meñ gum

mirī nazar meñ tere ḳhadd-o-ḳhāl tere ḳhvāb the

maiñ dūriyoñ ke bāvajūd tere aas paas thā

mayurka ke sāhiloñ pe maiñ bahut udaas thā

mayurka ke sahilon pe kis qadar gulab the

ki KHushbuen thi be-tarah ki rang be-hisab the

tunuk-libasiyan shanawaron ki thin qayamaten

tamam sim-tan sharik-e-jashn-e-shahr-e-ab the

shua-e-mahr ki ziya se the jigar jigar badan

qamar-jamal jin ke aks-e-raushni ke bab the

khuli faza ki dhup wo ki jism sanwle kare

butan-e-azari ki mast-e-ghusl-e-aftab the

yahin pata chala ki zist husn hai bahaar hai

yahin KHabar hui ki zindagi ke dukh sarab the

yahin laga ki gardishon ke zawiye badal gae

na roz o shab ki talKHiyan na waqt ke azab the

mere tamam dost ajnabi rafaqaton mein gum

meri nazar mein tere KHadd-o-KHal tere KHwab the

main duriyon ke bawajud tere aas pas tha

mayurka ke sahilon pe main bahut udas tha