mazdur laDki

vo ik mazdūr laḌkī hai

bahut āsān hai mere liye us ko manā lenā

zarā ārāsta ho luuñ

mirā ā.īna kahtā hai

kisī sab se baḌe but-sāz kā shahkār huuñ goyā

maiñ shahroñ ke tabassum-pāsh nazzāroñ kā paalā huuñ

maiñ parvarda huuñ bāroñ qahva-ḳhānoñ kī fazāoñ kā

maiñ jab shahroñ kī rañgīñ titliyoñ ko chheḌ letā huuñ

maiñ jab ārāsta ḳhalvat-kadoñ kī mez par jā kar

sharāboñ se bhī ḳhush-rañg phūloñ ko apnā hī letā huuñ

to phir ik gaañv kī paalī huī ma.asūm sī laḌkī

mire bas meñ na aa.egī

bhalā ye kaise mumkin hai?

aur

phir aise meñ jab maiñ chāhtā huuñ pyaar kartā huuñ

zarā baiTho

maiñ dariyā ke kināre

dhaan ke khetoñ meñ ho aa.uuñ

yahī mausam hai

jab dhartī se ham roTī ugāte haiñ

tumheñ taklīf to hogī

hamāre jhoñpaḌoñ meñ chārpā.ī bhī nahīñ hotī

nahīñ maiñ ruk ga.ī

to dhaan tak paanī na aa.egā

hamāre gaañv meñ

barsāt hī to ek mausam hai

ki jab ham

saal bhar ke vāste kuchh kaam karte haiñ

idhar baiTho

parā.ī laḌkiyoñ ko is tarah dekhā nahīñ karte

ye lipstick

ye powder

aur ye scarf

kyā hogā

mujhe khetoñ meñ mazdūrī se fursat hī nahīñ miltī

mire hoñToñ pe ghanToñ buuñd paanī kī nahīñ paḌtī

mire chehre mire baazū pe lū aur dhuup rahtī hai

gale meñ sirf pītal kā ye chandan haar kaafī hai

havā meñ dilkashī hai

aur fazā sonā luTātī hai

mujhe un se aqīdat hai

yahī merī matā.a merī nemat hai

bahut mamnūn huuñ lekin

huzūr aap apne tohfe

shahr kī pariyoñ meñ le jaa.eñ

wo ek mazdur laDki hai

bahut aasan hai mere liye us ko mana lena

zara aarasta ho lun

mera aaina kahta hai

kisi sab se baDe but-saz ka shahkar hun goya

main shahron ke tabassum-pash nazzaron ka pala hun

main parwarda hun baron qahwa-KHanon ki fazaon ka

main jab shahron ki rangin titliyon ko chheD leta hun

main jab aarasta KHalwat-kadon ki mez par ja kar

sharabon se bhi KHush-rang phulon ko apna hi leta hun

to phir ek ganw ki pali hui masum si laDki

mere bas mein na aaegi

bhala ye kaise mumkin hai?

aur

phir aise mein jab main chahta hun pyar karta hun

zara baiTho

main dariya ke kinare

dhan ke kheton mein ho aaun

yahi mausam hai

jab dharti se hum roTi ugate hain

tumhein taklif to hogi

hamare jhonpaDon mein chaarpai bhi nahin hoti

nahin main ruk gai

to dhan tak pani na aaega

hamare ganw mein

barsat hi to ek mausam hai

ki jab hum

sal bhar ke waste kuchh kaam karte hain

idhar baiTho

parai laDkiyon ko is tarah dekha nahin karte

ye lipstick

ye powder

aur ye scarf

kya hoga

mujhe kheton mein mazduri se fursat hi nahin milti

mere honTon pe ghanTon bund pani ki nahin paDti

mere chehre mere bazu pe lu aur dhup rahti hai

gale mein sirf pital ka ye chandan haar kafi hai

hawa mein dilkashi hai

aur faza sona luTati hai

mujhe un se aqidat hai

yahi meri mataa meri nemat hai

bahut mamnun hun lekin

huzur aap apne tohfe

shahr ki pariyon mein le jaen