mazdur ki maut

ek muflis ġharīb aur lāchār

jis kā hamdam koī na hai ġham-ḳhvār

jān-e-jamhūr us ko kahte haiñ

yaanī mazdūr us ko kahte haiñ

kaun samjhegā us kī majbūrī

chaar rupya huī hai mazdūrī

ik javāñ-sāl us kī beTī hai

vo bhī bīmār ghar meñ leTī hai

ghar raqam itnī le ke kyā jaa.e

itne meñ kyā khilā.e kyā khaa.e

sub.h se shaam hone aa.ī hai

ik udāsī sī ghar meñ chhā.ī hai

kaise vo bā-shu.ūr rahtā ho

har ḳhushī se jo duur rahtā ho

murda-dil ke lahū meñ josh nahīñ

fāqa-mastī meñ kuchh bhī hosh nahīñ

ghar meñ chāval hai aur na aaTā hai

raat din jaane kaise kaaTā hai

kaun duniyā meñ sunñe vaalā hai

zar-parastoñ kā bol-bālā hai

beTī ke ziist kā bujhā jo diyā

maut ne apnī āfiyat meñ liyā

aisā majbūr kis tarah se jiye

khaa.e ġham aur ḳhūn-e-dil jo piye

hasratoñ kā janāza ḳhuub gayā

ye bhī dariyā meñ jā ke Duub gayā

ek muflis gharib aur lachaar

jis ka hamdam koi na hai gham-KHwar

jaan-e-jamhur us ko kahte hain

yani mazdur us ko kahte hain

kaun samjhega us ki majburi

chaar rupya hui hai mazduri

ek jawan-sal us ki beTi hai

wo bhi bimar ghar mein leTi hai

ghar raqam itni le ke kya jae

itne mein kya khilae kya khae

subh se sham hone aai hai

ek udasi si ghar mein chhai hai

kaise wo ba-shuur rahta ho

har KHushi se jo dur rahta ho

murda-dil ke lahu mein josh nahin

faqa-masti mein kuchh bhi hosh nahin

ghar mein chawal hai aur na aaTa hai

raat din jaane kaise kaTa hai

kaun duniya mein sunne wala hai

zar-paraston ka bol-baala hai

beTi ke zist ka bujha jo diya

maut ne apni aafiyat mein liya

aisa majbur kis tarah se jiye

khae gham aur KHun-e-dil jo piye

hasraton ka janaza KHub gaya

ye bhi dariya mein ja ke Dub gaya