mearaj-e-nazar

insān ke parde meñ ḳhudā dekh rahā huuñ

maiñ zarf-e-nazar se bhī sivā dekh rahā huuñ

ahbāb meñ kam rang-e-vafā dekh rahā huuñ

ye vāqi.a sunñā to kujā dekh rahā huuñ

pahle to na thī fursat-e-nazzāra na dekhā

haañ ab to zarā parda uThā dekh rahā huuñ

jab tū nahīñ maujūd to kyā khel hai duniyā

din-rāt maiñ ye ḳhvāb sā kyā dekh rahā huuñ

kyā jāniye kyā hogī haqīqat meñ tajallī

ye aks agar jalva-numā dekh rahā huuñ

phir hone ko hai dil pe ġham-e-tāza kī yūrish

phir Duubī huī nabz-e-fazā dekh rahā huuñ

naqqāsh-e-azal maiñ tirī jiddat ke tasadduq

har naqsh se har naqsh judā dekh rahā huuñ

nazreñ haiñ mirī markaz-e-anvār pe qaa.em

taḳhlīq-e-do-ālam kī binā dekh rahā huuñ

ik tere na hone se haiñ be-rang manāzir

har saaz ko mahrūm-e-sadā dekh rahā huuñ

kaunain ko fitrat ne sañvārā to hai lekin

is aa.ine meñ aks-e-fanā dekh rahā huuñ

mere liye har barq hai tamhīd-e-nazāra

maiñ maut ke dāman meñ baqā dekh rahā huuñ

haiñ be-ḳhudī-e-shauq meñ be-parda do-ālam

har chiiz ko maiñ apne sivā dekh rahā huuñ

shā.ir kī nazar se unheñ dekhe koī 'naḳhshab'

maiñ kaise batā.ūñ ki maiñ kyā dekh rahā huuñ

insan ke parde mein KHuda dekh raha hun

main zarf-e-nazar se bhi siwa dekh raha hun

ahbab mein kam rang-e-wafa dekh raha hun

ye waqia sunna to kuja dekh raha hun

pahle to na thi fursat-e-nazzara na dekha

han ab to zara parda uTha dekh raha hun

jab tu nahin maujud to kya khel hai duniya

din-raat main ye KHwab sa kya dekh raha hun

kya jaaniye kya hogi haqiqat mein tajalli

ye aks agar jalwa-numa dekh raha hun

phir hone ko hai dil pe gham-e-taza ki yurish

phir Dubi hui nabz-e-faza dekh raha hun

naqqash-e-azal main teri jiddat ke tasadduq

har naqsh se har naqsh juda dekh raha hun

nazren hain meri markaz-e-anwar pe qaem

taKHliq-e-do-alam ki bina dekh raha hun

ek tere na hone se hain be-rang manazir

har saz ko mahrum-e-sada dekh raha hun

kaunain ko fitrat ne sanwara to hai lekin

is aaine mein aks-e-fana dekh raha hun

mere liye har barq hai tamhid-e-nazara

main maut ke daman mein baqa dekh raha hun

hain be-KHudi-e-shauq mein be-parda do-alam

har chiz ko main apne siwa dekh raha hun

shair ki nazar se unhen dekhe koi 'naKHshab'

main kaise bataun ki main kya dekh raha hun