jatri

ek aayā gayā dūsrā aa.egā der se dekhtā huuñ yūñhī raat us kī guzar jā.egī

maiñ khaḌā huuñ yahāñ kis liye mujh ko kyā kaam hai yaad aatā nahīñ yaad bhī TimTimātā

huā ik diyā ban ga.ī jis kī ruktī huī aur jhijaktī huī har kiran be-sadā qahqaha hai

magar mere kānoñ ne kaise use sun liyā ek āñdhī chalī chal ke miT

bhī ga.ī aaj tak mere kānoñ meñ maujūd hai saa.eñ saa.eñ machaltī huī aur

ubaltī huī phailtī phailtī der se maiñ khaḌā huuñ yahāñ ek aayā gayā

dūsrā aa.egā raat us kī guzar jā.egī ek hañgāma barpā hai dekheñ jidhar

aa rahe haiñ ka.ī log chalte hue aur Tahalte hue aur rukte hue phir se

baḌhte hue aur lapakte hue aa rahe jā rahe haiñ idhar se udhar aur udhar se

idhar jaise dil meñ mire dhyān kī lahar se ek tūfān hai vaise āñkheñ

mirī dekhtī hī chalī jā rahī haiñ ki ik TimTimāte diye kī kiran zindagī ko phisalte

hue aur girte hue Dhab se zāhir kiye jā rahī hai mujhe dhyān

aatā hai ab tīrgī ik ujālā banī hai magar is ujāle se ristī chalī jā rahī

haiñ vo amrit kī būñdeñ jinheñ maiñ hathelī pe apnī sambhāle rahā huuñ hathelī

magar TimTimātā huā ik diyā ban ga.ī thī lapak se ujālā huā lau girī phir añdherā sā

chhāne lagā baiThtā baiThtā baiTh kar ek hī pal meñ uThtā huā jaise āñdhī ke

tīkhe thapeḌoñ se darvāze ke taaq khulte raheñ band hote raheñ

phaḌ.phaḌāte hue tā.ir-e-zaḳhm-ḳhurda kī mānind maiñ dekhtā hī rahā ek aayā

gayā dūsrā aa.egā soch aa.ī mujhe paañv baḌhne se inkār karte

ga.e maiñ khaḌā hī rahā dil meñ ik buuñd ne ye kahā raat yūñhī guzar jā.egī

dil kī ik buuñd ko aañkh meñ le ke maiñ dekhtā hī rahā phaḌ.phaḌāte hue taa.ir

zaḳhm-ḳhurda kī mānind darvāze ke taaq ik baar jab mil ga.e mujh ko āhista āhista

ehsās hone lagā ab ye zaḳhmī parinda na taḌpegā lekin mire dil ko har vaqt

taḌpā.egā maiñ hathelī pe apnī sambhāle rahūñgā vo amrit kī būñdeñ jinheñ aañkh

se merī risnā thā lekin mirī zindagī TimTimātā huā ik diyā ban ga.ī jis kī ruktī huī

aur jhijaktī huī har kiran be-sadā qahqaha hai ki is tīrgī meñ koī baat aisī nahīñ

jis ko pahle añdhere meñ dekhā ho maiñ ne safar ye ujāle añdhere kā chaltā

rahā hai to chaltā rahegā yahī rasm hai raah kī ek aayā gayā dūsrā

aa.egā raat aise guzar jā.egī TimTimāte sitāre batāte the raste kī

naddī bahī jā rahī hai bahe jā is uljhan se aise nikal jā koī sīdhā manzil pe jaatā

thā lekin ka.ī qāfile bhuul jaate the anjum ke daur-e-yagānā ke mub.ham ishāre magar vo

bhī chalte hue aur baḌhte hue shaam se pahle hī dekh lete the maqsūd kā band

darvāza khulne lagā hai magar maiñ khaḌā huuñ yahāñ mujh ko kyā kaam hai merā darvāza

khultā nahīñ hai mujhe phaile sahrā kī soī huī reg kā zarra zarra yahī kah rahā hai

ke aise ḳharābe meñ sūkhī hathelī hai ik aisā talvā ke jis ko kisī ḳhaar kī nok chubhne pe bhī

kah nahīñ saktī mujh ko koī buuñd apne lahū kī pilā do magar maiñ khaḌā huuñ yahāñ kis liye

kaam koī nahīñ hai to maiñ bhī in aate hue aur jaate hue ek do tiin

lākhoñ bagūloñ meñ mil kar yūñhī chalte chalte kahīñ Duub jaatā ke jaise yahāñ

bahtī lahroñ meñ kashtī har ek mauj ko thaam letī hai apnī hathelī ke phaile kañval

meñ mujhe dhyān aatā nahīñ hai ki is raah meñ to har ik jaane vaale ke bas

meñ hai manzil maiñ chal duuñ chalūñ aa.iye aa.iye aap kyuuñ is jagah

aise chup-chāp tanhā khaḌe haiñ agar aap kahiye to ham ik achhūtī sī Tahnī se

do phuul bas bas mujhe is kī koī zarūrat nahīñ hai maiñ ik

dost kā rāsta dekhtā huuñ magar vo chalā bhī gayā hai mujhe phir bhī

taskīn aatī nahīñ hai ki maiñ ek sahrā kā bāshinda mālūm hone lagā huuñ ḳhud

apnī nazar meñ mujhe ab koī band darvāza khultā nazar aa.e ye baat mumkin nahīñ hai

maiñ ik aur āñdhī kā mushtāq huuñ jo mujhe apne parde meñ yaksar chhupā le

mujhe ab ye mahsūs hone lagā hai suhānā samāñ jitnā bas meñ thā mere

vo sab ek bahtā sā jhoñkā banā hai jise haath mere nahīñ rok sakte

ki merī hathelī meñ amrit kī būñdeñ to baaqī nahīñ haiñ faqat ek phailā huā

ḳhushk be-barg be-rañg sahrā hai jis meñ ye mumkin nahīñ maiñ kahūñ

ek aayā gayā dūsrā aa.egā raat merī guzar jā.egī

ek aaya gaya dusra aaega der se dekhta hun yunhi raat us ki guzar jaegi

main khaDa hun yahan kis liye mujh ko kya kaam hai yaad aata nahin yaad bhi TimTimata

hua ek diya ban gai jis ki rukti hui aur jhijakti hui har kiran be-sada qahqaha hai

magar mere kanon ne kaise use sun liya ek aandhi chali chal ke miT

bhi gai aaj tak mere kanon mein maujud hai saen saen machalti hui aur

ubalti hui phailti phailti der se main khaDa hun yahan ek aaya gaya

dusra aaega raat us ki guzar jaegi ek hangama barpa hai dekhen jidhar

aa rahe hain kai log chalte hue aur Tahalte hue aur rukte hue phir se

baDhte hue aur lapakte hue aa rahe ja rahe hain idhar se udhar aur udhar se

idhar jaise dil mein mere dhyan ki lahar se ek tufan hai waise aankhen

meri dekhti hi chali ja rahi hain ki ek TimTimate diye ki kiran zindagi ko phisalte

hue aur girte hue Dhab se zahir kiye ja rahi hai mujhe dhyan

aata hai ab tirgi ek ujala bani hai magar is ujale se risti chali ja rahi

hain wo amrit ki bunden jinhen main hatheli pe apni sambhaale raha hun hatheli

magar TimTimata hua ek diya ban gai thi lapak se ujala hua lau giri phir andhera sa

chhane laga baiThta baiThta baiTh kar ek hi pal mein uThta hua jaise aandhi ke

tikhe thapeDon se darwaze ke taq khulte rahen band hote rahen

phaDphaDate hue tair-e-zaKHm-KHurda ki manind main dekhta hi raha ek aaya

gaya dusra aaega soch aai mujhe panw baDhne se inkar karte

gae main khaDa hi raha dil mein ek bund ne ye kaha raat yunhi guzar jaegi

dil ki ek bund ko aankh mein le ke main dekhta hi raha phaDphaDate hue tair

zaKHm-KHurda ki manind darwaze ke taq ek bar jab mil gae mujh ko aahista aahista

ehsas hone laga ab ye zaKHmi parinda na taDpega lekin mere dil ko har waqt

taDpaega main hatheli pe apni sambhaale rahunga wo amrit ki bunden jinhen aankh

se meri risna tha lekin meri zindagi TimTimata hua ek diya ban gai jis ki rukti hui

aur jhijakti hui har kiran be-sada qahqaha hai ki is tirgi mein koi baat aisi nahin

jis ko pahle andhere mein dekha ho main ne safar ye ujale andhere ka chalta

raha hai to chalta rahega yahi rasm hai rah ki ek aaya gaya dusra

aaega raat aise guzar jaegi TimTimate sitare batate the raste ki

naddi bahi ja rahi hai bahe ja is uljhan se aise nikal ja koi sidha manzil pe jata

tha lekin kai qafile bhul jate the anjum ke daur-e-yagana ke mubham ishaare magar wo

bhi chalte hue aur baDhte hue sham se pahle hi dekh lete the maqsud ka band

darwaza khulne laga hai magar main khaDa hun yahan mujh ko kya kaam hai mera darwaza

khulta nahin hai mujhe phaile sahra ki soi hui reg ka zarra zarra yahi kah raha hai

ke aise KHarabe mein sukhi hatheli hai ek aisa talwa ke jis ko kisi KHar ki nok chubhne pe bhi

kah nahin sakti mujh ko koi bund apne lahu ki pila do magar main khaDa hun yahan kis liye

kaam koi nahin hai to main bhi in aate hue aur jate hue ek do tin

lakhon bagulon mein mil kar yunhi chalte chalte kahin Dub jata ke jaise yahan

bahti lahron mein kashti har ek mauj ko tham leti hai apni hatheli ke phaile kanwal

mein mujhe dhyan aata nahin hai ki is rah mein to har ek jaane wale ke bas

mein hai manzil main chal dun chalun aaiye aaiye aap kyun is jagah

aise chup-chap tanha khaDe hain agar aap kahiye to hum ek achhuti si Tahni se

do phul bas bas mujhe is ki koi zarurat nahin hai main ek

dost ka rasta dekhta hun magar wo chala bhi gaya hai mujhe phir bhi

taskin aati nahin hai ki main ek sahra ka bashinda malum hone laga hun KHud

apni nazar mein mujhe ab koi band darwaza khulta nazar aae ye baat mumkin nahin hai

main ek aur aandhi ka mushtaq hun jo mujhe apne parde mein yaksar chhupa le

mujhe ab ye mahsus hone laga hai suhana saman jitna bas mein tha mere

wo sab ek bahta sa jhonka bana hai jise hath mere nahin rok sakte

ki meri hatheli mein amrit ki bunden to baqi nahin hain faqat ek phaila hua

KHushk be-barg be-rang sahra hai jis mein ye mumkin nahin main kahun

ek aaya gaya dusra aaega raat meri guzar jaegi