mehrban farsh par

ik muallaq ḳhalā meñ kahīñ nā-gahāñ

mehrbāñ farsh par paañv merā paḌā

maiñ ne dekhā khulā hai mire sāmne

zar-nigār o munaqqash bahut hī baḌā

ek dar ḳhvāb kā

mehrbāñ farsh ke

marmarīñ pattharoñ se huvaidā huā

aks mahtāb kā

maiñ ne haath apne aage baḌhā.e

aur us ko chhuā

ghanTiyāñ mere kānoñ meñ bajne lagīñ

jāvedāñ aur ġhinā.ī rifāqat ke mābain thā

merā sahrā-e-jāñ

ik muallaq ḳhalā meñ kahīñ nā-gahāñ

maiñ ne dekhā

mire shab-numā jism par

ik sitāra sī bārish ne lab rakh diyā

narm burrāq tarshe hue taaq par

jitnā zād-e-safar mere ham-rāh thā

maiñ ne sab rakh diyā

ab maiñ āzād thā

aur tilismīñ paḌāv kā har ism bhī yaad thā

maiñ ne dekhā

mire chaar jānib jhukā thā

piyāla-numā āsmāñ

merā mahram mirī saañs kā rāz-dāñ

ik muallaq ḳhalā meñ kahīñ nā-gahāñ

mehrbāñ farsh par paañv merā paḌā

maiñ ne dekhā khulā hai mire sāmne

zar-nigār o munaqqash bahut hī baḌā

ek dar ḳhvāb kā

ek muallaq KHala mein kahin na-gahan

mehrban farsh par panw mera paDa

main ne dekha khula hai mere samne

zar-nigar o munaqqash bahut hi baDa

ek dar KHwab ka

mehrban farsh ke

marmarin pattharon se huwaida hua

aks mahtab ka

main ne hath apne aage baDhae

aur us ko chhua

ghanTiyan mere kanon mein bajne lagin

jawedan aur ghinai rifaqat ke mabain tha

mera sahra-e-jaan

ek muallaq KHala mein kahin na-gahan

main ne dekha

mere shab-numa jism par

ek sitara si barish ne lab rakh diya

narm burraq tarshe hue taq par

jitna zad-e-safar mere ham-rah tha

main ne sab rakh diya

ab main aazad tha

aur tilismin paDaw ka har ism bhi yaad tha

main ne dekha

mere chaar jaanib jhuka tha

piyala-numa aasman

mera mahram meri sans ka raaz-dan

ek muallaq KHala mein kahin na-gahan

mehrban farsh par panw mera paDa

main ne dekha khula hai mere samne

zar-nigar o munaqqash bahut hi baDa

ek dar KHwab ka