mehwar

qadam miTTī pe rakhtī ho

ki arsh uupar Thaharte haiñ

ki jab tum paañv dhartī ho

to dhartī ke jigar kī dhaḌkaneñ bhī āzmātī ho

bahāroñ meñ bikhartīñ to tumheñ bas DhūñDte phirte

magar tum rañg-o-bū ko apnā pas-manzar banātī ho

ḳhush-dilī ke qahqahe kī nuqra.ī ghanTī ke naġhmoñ kī khanak ke saath

saare manzaroñ par phail jaatī ho

vo saa.at jis meñ tum dam lo

zamāne kī har ik taqdīm se bāhar

koī phailā huā lamha Thahartī hai

vo sab goshe jahāñ tanhā.ī tum ko khīñch le jaa.e

vahīñ to reshmī nik.hat kī tanvīreñ bikhartī haiñ

ye tasvīreñ

ki jin meñ tum ne dekhā

log din ke haft-ḳhvāñ ko kāTte guzre

ye sab ḳhuuñ thūkte

zaḳhm apne apne chāTte insāñ

faqat us shaam kī aahaT pe jaate haiñ

jahāñ tum ho

qadam miTTi pe rakhti ho

ki arsh upar Thaharte hain

ki jab tum panw dharti ho

to dharti ke jigar ki dhaDkanen bhi aazmati ho

bahaaron mein bikhartin to tumhein bas DhunDte phirte

magar tum rang-o-bu ko apna pas-manzar banati ho

KHush-dili ke qahqahe ki nuqrai ghanTi ke naghmon ki khanak ke sath

sare manzaron par phail jati ho

wo saat jis mein tum dam lo

zamane ki har ek taqdim se bahar

koi phaila hua lamha Thaharti hai

wo sab goshe jahan tanhai tum ko khinch le jae

wahin to reshmi nikhat ki tanwiren bikharti hain

ye taswiren

ki jin mein tum ne dekha

log din ke haft-KHwan ko kaTte guzre

ye sab KHun thukte

zaKHm apne apne chaTte insan

faqat us sham ki aahaT pe jate hain

jahan tum ho