mera beTa

maiñ sub.h tāzgī oḌhe hue

ghar se nikaltā

shaam apne jism ko laade hue

jab ghar meñ aatā thā

merā beTā

muraqqa' merī ḳhushiyoñ kā

mirī āvāz sunte hī

ḳhushī se chīḳhtā kahtā

ki abbā aa ga.e mere mire abbā mire abbā

uchaktā be-tahāshā dauḌ kar

vo mujh ko chhū lene kī ḳhvāhish meñ

lapaktā merī Tāñgoñ se lipaT kar

sar uThātā aur phir hāthoñ ko phailā kar

baḌī be-tābiyoñ ke saath

merī god meñ aatā

mujhe ik lams de kar

jism kī saarī thakan ko chuus letā thā

magar ab vo mire qad ke barābar

mere armānoñ kā paikar merī Dhāras hai

maiñ kab ghar se nikaltā huuñ

kab apne ghar meñ aatā huuñ

use mā'lūm hotā hai

magar vo bhī thake-māñde badan se chuur hotā hai

maiñ us ko dekhtā huuñ jab

vahī mā'sūm sī sūrat

mirī āñkhoñ meñ phirtī hai

mohabbat se bharā tūfān

mere dil meñ uThtā hai

maiñ us ko pyaar karne kī tamanna meñ

qadam jaise baḌhātā huuñ

koī had

koī sarhad darmiyāñ mahsūs hotī hai

main subh tazgi oDhe hue

ghar se nikalta

sham apne jism ko lade hue

jab ghar mein aata tha

mera beTa

muraqqa' meri KHushiyon ka

meri aawaz sunte hi

KHushi se chiKHta kahta

ki abba aa gae mere mere abba mere abba

uchakta be-tahasha dauD kar

wo mujh ko chhu lene ki KHwahish mein

lapakta meri Tangon se lipaT kar

sar uThata aur phir hathon ko phaila kar

baDi be-tabiyon ke sath

meri god mein aata

mujhe ek lams de kar

jism ki sari thakan ko chus leta tha

magar ab wo mere qad ke barabar

mere armanon ka paikar meri Dhaaras hai

main kab ghar se nikalta hun

kab apne ghar mein aata hun

use ma'lum hota hai

magar wo bhi thake-mande badan se chur hota hai

main us ko dekhta hun jab

wahi ma'sum si surat

meri aankhon mein phirti hai

mohabbat se bhara tufan

mere dil mein uThta hai

main us ko pyar karne ki tamanna mein

qadam jaise baDhata hun

koi had

koi sarhad darmiyan mahsus hoti hai