mera ghar mera virana

dīdanī hai ye mirā ghar mirā vīrāna bhī

is guzargāh pe kuchh der Thahar jā sayyāh

mujh ko ma.alūm hai tū saarā jahāñ dekh chukā

haañ ufuq-tā-ba-ufuq saarī zamīñ dekhī hai

tū ne aivān bhī dekhe haiñ khañDar bhī dekhe

vādiyāñ dekhīñ pahāḌoñ kī jabīñ dekhī hai

merī duniyā meñ zarā dekh ki is duniyā ko

dekhne vāloñ ne ab tak kabhī dekhā hī nahīñ

maiñ fasāna huuñ koī chāhe to mujh ko likh le

par mirā haal kisī ne kabhī pūchhā hī nahīñ

tujh ko ai dost dikhā.ūñ ki kahāñ rahtā huuñ

ye vo ghar hai ki jo shāyad kabhī ho saktā thā ghar

tujh ko shāyad na nazar aa.e magar ye sach hai

is ke siine meñ haiñ poshīda mire la.al-o-gohar

ye zamīñ ujḌī huī TuuTī huī hai dīvār

par isī kokh meñ dhartī kī hai sarmāya mirā

maiñ jo is vaqt nazar aatā huuñ ye maiñ nahīñ huuñ

merī tasvīr hai dhundlā sā hai ye saaya mirā

mirī tasvīr kī āñkhoñ meñ basā hai ik shahr

is meñ haiñ ūñche mahal jo maiñ banā saktā thā

is meñ haiñ merī vo ḳhushiyāñ ki jo mil saktī thiiñ

is meñ hai merī vo manzil jo maiñ pā saktā thā

is meñ haiñ merī mohabbat ke vo saare armāñ

jin se mahrūm rahā merā ye bedār shabāb

is meñ haiñ merī kitābeñ ki jo likkhī na ga.iiñ

is meñ haiñ mere vo ash.ār nahīñ jin kā javāb

haañ yahīñ dafn haiñ vo saarī kitābeñ jin ko

zindagī detī jo fursat to maiñ likh saktā thā

isī miTTī meñ haiñ vo nazmeñ vo ġhazleñ merī

jin ko kahne koī detā to maiñ kah saktā thā

mere sayyāh bahut tū ne maqābir dekhe

sach kahā sadiyoñ meñ ik tāj-mahal bantā hai

haañ magar merī tarah roz hī insāñ koī

zinda rahne ke liye dahr meñ mar jaatā hai

didani hai ye mera ghar mera virana bhi

is guzargah pe kuchh der Thahar ja sayyah

mujh ko malum hai tu sara jahan dekh chuka

han ufuq-ta-ba-ufuq sari zamin dekhi hai

tu ne aiwan bhi dekhe hain khanDar bhi dekhe

wadiyan dekhin pahaDon ki jabin dekhi hai

meri duniya mein zara dekh ki is duniya ko

dekhne walon ne ab tak kabhi dekha hi nahin

main fasana hun koi chahe to mujh ko likh le

par mera haal kisi ne kabhi puchha hi nahin

tujh ko ai dost dikhaun ki kahan rahta hun

ye wo ghar hai ki jo shayad kabhi ho sakta tha ghar

tujh ko shayad na nazar aae magar ye sach hai

is ke sine mein hain poshida mere lal-o-gohar

ye zamin ujDi hui TuTi hui hai diwar

par isi kokh mein dharti ki hai sarmaya mera

main jo is waqt nazar aata hun ye main nahin hun

meri taswir hai dhundla sa hai ye saya mera

meri taswir ki aankhon mein basa hai ek shahr

is mein hain unche mahal jo main bana sakta tha

is mein hain meri wo KHushiyan ki jo mil sakti thin

is mein hai meri wo manzil jo main pa sakta tha

is mein hain meri mohabbat ke wo sare arman

jin se mahrum raha mera ye bedar shabab

is mein hain meri kitaben ki jo likkhi na gain

is mein hain mere wo ashaar nahin jin ka jawab

han yahin dafn hain wo sari kitaben jin ko

zindagi deti jo fursat to main likh sakta tha

isi miTTi mein hain wo nazmen wo ghazlen meri

jin ko kahne koi deta to main kah sakta tha

mere sayyah bahut tu ne maqabir dekhe

sach kaha sadiyon mein ek taj-mahal banta hai

han magar meri tarah roz hi insan koi

zinda rahne ke liye dahr mein mar jata hai