mera janam din

zehn pe ik ghaTā sī chhā.ī hai

lafzoñ kī an-jānī būñdeñ baras rahī haiñ

koī ma.anī shāyad nikleñ?

zaḳhmī taa.ir mere qalam se lipaT gayā

aur us ke pahlū meñ ik nanhā sā tiir hai

tiir meñ ik kāġhaz bhī hai

ab ke mere janm-din par

kis ne mujh ko yaad kiyā hai?

maiñ ne kāġhaz khol ke dekhā

kuchh bhī na thā

sirf TuuTī TuuTī chand lakīreñ thiiñ

aise ḳhat aate rahte haiñ

naam nahīñ hotā jin par

baat nahīñ bantī lekin

baat banegī kaise?

jab pahlū meñ ḳhaar lagā ho

āñkhoñ meñ nam aa bhī chukā ho

janam janam ke saude meñ tum

sab se aage nikal ga.e ho

saare sāthī chhūT ga.e

ġham ke chhāle phuuT ga.e

jiine kī ummīd nahīñ hai

phir bhī tum ab tak jiite ho

umr tumhārī maut se aage nikal ga.ī hai

sannāTe meñ jiinā kitnā mushkil hai

ḳhvāhish ke sadme bhī nahīñ haiñ

zehn pe ek ghaTa si chhai hai

lafzon ki an-jaani bunden baras rahi hain

koi mani shayad niklen?

zaKHmi tair mere qalam se lipaT gaya

aur us ke pahlu mein ek nanha sa tir hai

tir mein ek kaghaz bhi hai

ab ke mere janm-din par

kis ne mujh ko yaad kiya hai?

main ne kaghaz khol ke dekha

kuchh bhi na tha

sirf TuTi TuTi chand lakiren thin

aise KHat aate rahte hain

nam nahin hota jin par

baat nahin banti lekin

baat banegi kaise?

jab pahlu mein KHar laga ho

aankhon mein nam aa bhi chuka ho

janam janam ke saude mein tum

sab se aage nikal gae ho

sare sathi chhuT gae

gham ke chhaale phuT gae

jine ki ummid nahin hai

phir bhi tum ab tak jite ho

umr tumhaari maut se aage nikal gai hai

sannaTe mein jina kitna mushkil hai

KHwahish ke sadme bhi nahin hain