mera ji chahta hai

tumhāre reshmī bistar se utrūñ

mujhe utnī zamīñ de do jahāñ maiñ paañv rakh luuñ

zarā sā āsmāñ jis se maiñ apne sar ko Dhak luuñ

farāġhat kā koī lamha ki jis meñ

maiñ apne dil kī bikhrī ḳhvāhisheñ āñgan se chun kar

tumhāre dil kī almārī meñ rakkhūñ

tumhārī ḳhāk-e-pā meñ gum hue ḳhvāboñ ko DhūñDūñ

aur apne mushkbū takiye meñ bhar luuñ

tumhāre paañv se lipTī huī nazroñ ko kholūñ

zarā sā sar uThā kar āsmāñ kā rañg dekhūñ

tumhāre pyaar kī niilī fazā meñ zindagī-bhar

parinde kī tarah maiñ uḌtī jā.ūñ

mirā dil to bahut kuchh chāhtā hai

magar is dil kā kyā hai

tumhaare reshmi bistar se utrun

mujhe utni zamin de do jahan main panw rakh lun

zara sa aasman jis se main apne sar ko Dhak lun

faraghat ka koi lamha ki jis mein

main apne dil ki bikhri KHwahishen aangan se chun kar

tumhaare dil ki almari mein rakkhun

tumhaari KHak-e-pa mein gum hue KHwabon ko DhunDun

aur apne mushkbu takiye mein bhar lun

tumhaare panw se lipTi hui nazron ko kholun

zara sa sar uTha kar aasman ka rang dekhun

tumhaare pyar ki nili faza mein zindagi-bhar

parinde ki tarah main uDti jaun

mera dil to bahut kuchh chahta hai

magar is dil ka kya hai