mera munna

niiñd meñ mirā munnā

roz muskurātā hai

chuskiyāñ sī bhartā hai

aur khilkhilātā hai

niiñd meñ mirā munnā

ḳhvāb dekhtā hogā

duudh kī ka.ī nahreñ

ḳhvāb meñ bahī hoñgī

nanhe nanhe paudoñ par

toffiyāñ lagī hoñgī

cake ke makāñ hoñge

jin kī chhat pe makkhan kī

barf jam rahī hogī

chāñd hans rahā hogā

chāñdnī khilī hogī

nannhī-munnī chiḌiyā.eñ

niilī piilī guḌiyā.eñ

raqs kar rahī hoñgī

ek Taañg kā murġhā

baañg de rahā hogā

pichhle paañv par bhālū

nāchne lagā hogā

kaaTh kā hasīñ ghoḌā

hinhinā rahā hogā

jis pe baiTh kar munnā

muskurā rahā hogā

aur us kī ammāñ kī

pyaar se bharī āñkheñ

ek ek kone se

us ko dekhtī hoñgī

niiñd meñ mirā munnā

roz muskurātā hai

chuskiyāñ sī bhartā hai

aur khilkhilātā hai

niiñd meñ mirā munnā

chauñk chauñk paḌtā hai

haḌbaḌā sā jaatā hai

aur rone lagtā hai

niiñd meñ mirā munnā

ḳhvāb dekhtā hogā

ik ghanā ghanā jangal

ḳhvāb meñ rahā hogā

ūñche ūñche peḌoñ kī

phailī phailī shāḳhoñ par

saañp reñgte hoñge

sabz sabz pattoñ ke

narm narm bistar par

sher ūñghte hoñge

hāthiyoñ ke dal ke dal

lambī lambī sūñDoñ se

ghaas khā rahe hoñge

jhāḌiyoñ meñ chhup-chhup kar

kaale kaale ban-mānus

tiir pheñkte hoñge

haañ unhī darindoñ meñ

ho na ho mirā munnā

ghir ke rah gayā hogā

aur us kī ammāñ kī

ḳhauf se bharī āñkheñ

ek ek kone se

us ko dekhtī hoñgī

niiñd meñ mirā munnā

chauñk chauñk paḌtā hai

haḌbaḌā sā jaatā hai

aur rone lagtā hai

jaag kar mirā munnā

mujh ko paas paatā hai

merī god meñ aa kar

ronā bhuul jaatā hai

nind mein mera munna

roz muskuraata hai

chuskiyan si bharta hai

aur khilkhilata hai

nind mein mera munna

KHwab dekhta hoga

dudh ki kai nahren

KHwab mein bahi hongi

nanhe nanhe paudon par

toffiyan lagi hongi

cake ke makan honge

jin ki chhat pe makkhan ki

barf jam rahi hogi

chand hans raha hoga

chandni khili hogi

nannhi-munni chiDiyaen

nili pili guDiyaen

raqs kar rahi hongi

ek Tang ka murgha

bang de raha hoga

pichhle panw par bhaalu

nachne laga hoga

kaTh ka hasin ghoDa

hinhina raha hoga

jis pe baiTh kar munna

muskura raha hoga

aur us ki amman ki

pyar se bhari aankhen

ek ek kone se

us ko dekhti hongi

nind mein mera munna

roz muskuraata hai

chuskiyan si bharta hai

aur khilkhilata hai

nind mein mera munna

chaunk chaunk paDta hai

haDbaDa sa jata hai

aur rone lagta hai

nind mein mera munna

KHwab dekhta hoga

ek ghana ghana jangal

KHwab mein raha hoga

unche unche peDon ki

phaili phaili shaKHon par

sanp rengte honge

sabz sabz patton ke

narm narm bistar par

sher unghte honge

hathiyon ke dal ke dal

lambi lambi sunDon se

ghas kha rahe honge

jhaDiyon mein chhup-chhup kar

kale kale ban-manus

tir phenkte honge

han unhi darindon mein

ho na ho mera munna

ghir ke rah gaya hoga

aur us ki amman ki

KHauf se bhari aankhen

ek ek kone se

us ko dekhti hongi

nind mein mera munna

chaunk chaunk paDta hai

haDbaDa sa jata hai

aur rone lagta hai

jag kar mera munna

mujh ko pas pata hai

meri god mein aa kar

rona bhul jata hai