mera nam

vo jo

apne ko merā harīf aur muqābil samajhte haiñ

in se kaho

dostī zindagī kā aTal faisla

āḳhirī hukm hai

aur is farz ko Tālnā

yā havas ke liye bech denā

mire dosto dushmano

jurm hai ik mazarrat-rasāñ jurm hai

mujh ko marġhūb hai zindagī

mujh ko mahbūb hai maut ke raaz ko faash kartī huī chāñdnī

aur mire saath hai

mah-vashoñ māh-pāroñ kā vo kārvāñ

jis ne zulmat ke lashkar ko paspā kiyā

har añdhere se ik chāñd paidā kiyā

aaj merā vatan

mere adā-nāz fikr-o-nazar kī tarah

shaad āzād o ābād rahne kī rāhoñ pe hai

nāriyal kī zamīñ kā nirālā nikhār

yaanī barg-e-ḳhizāñ-ḳhurda

hai sogvār

aarzū

nau-shagufta surūr-e-bahār

dil kī jānib nigāh mahtāb-dār

ajnabī maiñ nahīñ

naam pūchho mirā

maiñ tumhārī tamannā-e-hastī huuñ

shā.er

mirā naam hai

aur kuchh bhī nahīñ

aur

kuchh bhī nahīñ

vo jo apne ko merā harīf aur muqābil samajhte haiñ

un se kaho

dostī

zindagī kā aTal faisla

āḳhirī hukm hai

wo jo

apne ko mera harif aur muqabil samajhte hain

in se kaho

dosti zindagi ka aTal faisla

aaKHiri hukm hai

aur is farz ko Talna

ya hawas ke liye bech dena

mere dosto dushmano

jurm hai ek mazarrat-rasan jurm hai

mujh ko marghub hai zindagi

mujh ko mahbub hai maut ke raaz ko fash karti hui chandni

aur mere sath hai

mah-washon mah-paron ka wo karwan

jis ne zulmat ke lashkar ko paspa kiya

har andhere se ek chand paida kiya

aaj mera watan

mere ada-naz fikr-o-nazar ki tarah

shad aazad o aabaad rahne ki rahon pe hai

nariyal ki zamin ka nirala nikhaar

yani barg-e-KHizan-KHurda

hai sogwar

aarzu

nau-shagufta surur-e-bahaar

dil ki jaanib nigah mahtab-dar

ajnabi main nahin

nam puchho mera

main tumhaari tamanna-e-hasti hun

shaer

mera nam hai

aur kuchh bhi nahin

aur

kuchh bhi nahin

wo jo apne ko mera harif aur muqabil samajhte hain

un se kaho

dosti

zindagi ka aTal faisla

aaKHiri hukm hai