mera qalam

qalam ko mire ye qasam hai dilā.ī

na haq se kare bhuul kar bevafā.ī

hai jamhūr kī bas amānat qalam ye

na masnad kī qurbat ise raas aa.ī

tasanno' se nafrat hai mere qalam ko

‘alāmat mire she'r kī be-riyā.ī

hai iz.hār kī ḳhuub jur.at qalam meñ

hai pur-ḳhām go merī naġhma-sarā.ī

maiñ ashkoñ meñ ḳhūn-e-jigar huuñ milātā

bane tab qalam kī mire raushnā.ī

mirā saath de ai qalam tū vahāñ tak

taḳhayyul kī mere jahāñ tak rasā.ī

'sadā' lauh chhin jaa.e TuuTe qalam bhī

lage jo kabhī ‘illat-e-ḳhud-satā.ī

qalam ko mere ye qasam hai dilai

na haq se kare bhul kar bewafai

hai jamhur ki bas amanat qalam ye

na masnad ki qurbat ise ras aai

tasanno' se nafrat hai mere qalam ko

‘alamat mere she'r ki be-riyai

hai izhaar ki KHub jurat qalam mein

hai pur-KHam go meri naghma-sarai

main ashkon mein KHun-e-jigar hun milata

bane tab qalam ki mere raushnai

mera sath de ai qalam tu wahan tak

taKHayyul ki mere jahan tak rasai

'sada' lauh chhin jae TuTe qalam bhi

lage jo kabhi ‘illat-e-KHud-satai