mera watan

jahāñ kā chappa chappa gulsitāñ hai

jahāñ kī sar-zamīñ rashk-e-jināñ hai

tasadduq jis pe husn-e-āsmāñ hai

himāla jis kī azmat kā nishāñ hai

jahāñ gangā jahāñ jamunā ravāñ hai

vahī merā vatan hindostāñ hai

jahāñ rangīn hotī haiñ fazā.eñ

basī rahtī haiñ ḳhushbū meñ havā.eñ

dikhāte haiñ pahāḌ aur ban adā.eñ

jahāñ jharne kī maujeñ gungunā.eñ

jahāñ nadiyoñ kā paanī kaif-e-jāñ hai

vahī merā vatan hindostāñ hai

jahāñ chaupāl haiñ gaañv kī zīnat

jahāñ hai panghaToñ kī qadr-o-qīmat

barastī hai jahāñ khetoñ pe rahmat

jahāñ fasleñ haiñ khaliyānoñ kī daulat

jahāñ peḌoñ ke saa.e meñ amaañ hai

vahī merā vatan hindostāñ hai

jahāñ sub.h-e-banaras hai misālī

avadh kī shaam hai shām-e-divālī

jahāñ hai 'mālva' kī shab nirālī

hai rājasthān kī rangat gulābī

jahāñ dilkash dakan kā har samāñ hai

vahī merā vatan hindostāñ hai

jahāñ maz.hab ke gahvāre haiñ raushan

kalīsā aur gurudvāre haiñ raushan

masājid aur mīnāre haiñ raushan

jahāñ ke but-kade saare haiñ raushan

jahāñ sham-e-ibādat zau-fishāñ hai

vahī merā vatan hindostāñ hai

jahāñ fan aur tahzībeñ amar haiñ

jahāñ qilā-o-qutub lutf-e-nazar haiñ

jahāñ tāj-o-ajantā jalva-gar haiñ

jahāñ kī ḳhushnumā shām-o-sahar haiñ

jahāñ har raah rāh-e-kahkashāñ hai

vahī merā vatan hindostāñ hai

jahāñ 'rām'-o-'krishn'-o-'laxman' the

jahāñ miirā ke hoñToñ par bhajan the

jahāñ 'sūr' aur un ke kīrtan the

jahāñ 'rai-dās' bhagTī meñ magan the

jahāñ 'tulsī' the rāmā.en jahāñ hai

vahī merā vatan hindostāñ hai

jahāñ ḳhvāja muīnuddīn aa.e

nizāmuddīm jis meñ jagmagā.e

jahāñ 'ras-ḳhān'-o-'ḳhusrau' gungunā.e

'kabīr'-o-'jā.isī' ne naġhme gaa.e

jahāñ 'ġhālib' kī fikr-e-jāvedāñ hai

vahī merā vatan hindostāñ hai

jahāñ aurat ne kī hai hukmrānī

lahū se apne likkhī hai kahānī

jahāñ paidā huī 'jhāñsī' kī raanī

hai 'raziya' jis kī azmat kī nishānī

sunahrī jis kī har ik dāstāñ hai

vahī merā vatan hindostāñ hai

jahāñ muġhaloñ ne fan se raushnī kī

marāThoñ ne jahāñ tārīḳh likkhī

jo dhartī rājputoñ kī hai dhartī

shujā.at jis ko bundeloñ ne baḳhshī

jahāñ bañgāl kā azm-e-javāñ hai

vahī merā vatan hindostāñ hai

jahan ka chappa chappa gulsitan hai

jahan ki sar-zamin rashk-e-jinan hai

tasadduq jis pe husn-e-asman hai

himala jis ki azmat ka nishan hai

jahan ganga jahan jamuna rawan hai

wahi mera watan hindostan hai

jahan rangin hoti hain fazaen

basi rahti hain KHushbu mein hawaen

dikhate hain pahaD aur ban adaen

jahan jharne ki maujen gungunaen

jahan nadiyon ka pani kaif-e-jaan hai

wahi mera watan hindostan hai

jahan chaupal hain ganw ki zinat

jahan hai panghaTon ki qadr-o-qimat

barasti hai jahan kheton pe rahmat

jahan faslen hain khaliyanon ki daulat

jahan peDon ke sae mein aman hai

wahi mera watan hindostan hai

jahan subh-e-banaras hai misali

awadh ki sham hai sham-e-diwali

jahan hai 'malwa' ki shab nirali

hai rajasthan ki rangat gulabi

jahan dilkash dakan ka har saman hai

wahi mera watan hindostan hai

jahan mazhab ke gahware hain raushan

kalisa aur gurudware hain raushan

masajid aur minare hain raushan

jahan ke but-kade sare hain raushan

jahan sham-e-ibaadat zau-fishan hai

wahi mera watan hindostan hai

jahan fan aur tahziben amar hain

jahan qila-o-qutub lutf-e-nazar hain

jahan taj-o-ajanta jalwa-gar hain

jahan ki KHushnuma sham-o-sahar hain

jahan har rah rah-e-kahkashan hai

wahi mera watan hindostan hai

jahan 'ram'-o-'krishn'-o-'laxman' the

jahan mera ke honTon par bhajan the

jahan 'sur' aur un ke kirtan the

jahan 'rai-das' bhagTi mein magan the

jahan 'tulsi' the ramaen jahan hai

wahi mera watan hindostan hai

jahan KHwaja muinuddin aae

nizamuddim jis mein jagmagae

jahan 'ras-KHan'-o-'KHusrau' gungunae

'kabir'-o-'jaisi' ne naghme gae

jahan 'ghaalib' ki fikr-e-jawedan hai

wahi mera watan hindostan hai

jahan aurat ne ki hai hukmrani

lahu se apne likkhi hai kahani

jahan paida hui 'jhansi' ki rani

hai 'raziya' jis ki azmat ki nishani

sunahri jis ki har ek dastan hai

wahi mera watan hindostan hai

jahan mughalon ne fan se raushni ki

maraThon ne jahan tariKH likkhi

jo dharti rajputon ki hai dharti

shujaat jis ko bundelon ne baKHshi

jahan bangal ka azm-e-jawan hai

wahi mera watan hindostan hai