mera watan yahi hai

ye dil kī rāheñ udaas kyoñ haiñ umiid ke qāfile kahāñ haiñ

ham apne kūchoñ meñ ajnabī haiñ ham apne hī ghar meñ mehmāñ haiñ

yahī hai markaz hamāre har ḳhvāb-e-ārzū kā

yahī vatan hai yahī hai maskan vafā ummīd-o-justujū kā

yahī vatan hai isī ke kūchoñ ne ḳhvāb-e-nau dekhne sikhā.e

isī ke zarroñ kī chāhatoñ ne

hamāre bachpan kī narm-o-nau-ḳhez ḳhvāhishoñ ko

javāñ ‘azā.im kī aañch baḳhshī

isī ke siine kī dhaḌkanoñ ne

hamāre dil ke ‘amīq goshoñ ko raushnī kī na.ī kiran dī

ham is kī godī kī rāhatoñ ko

yahāñ se Thukrā ke kaise jaate

ham is kī mamtā kā soz kho kar

sukūn-o-ārām kaise paate

us ajnabī des kī fazāoñ meñ dil kā āhang kaise miltā

un ajnabī vādiyoñ ke dāman meñ chaah ke phuul kaise khilte

ye vārdāteñ ye naqsh-e-ulfat agar kahīñ hai to bas yahāñ haiñ

asāḌh ke halke halke bādal

jhaḌī vo bhādoñ kī dopahar kī

vo koyaloñ ke gudāz naġhmoñ meñ ras badaltī huī rutoñ kā

vo nīlgūñ sub.h kī fazā.eñ

vo dil-nashīñ shaam ke dhuñdalke

hamāre aamoñ ke baaġh bāñsoñ ke jhunD dariyāoñ ke kināre

hamāre sarsoñ ke khet pīpal kī chhāñv zarrāt ke ishāre

hamārā dāman pakaḌ rahe the

yaqīñ se jholī ko bhar rahe the

vo pūchhte the tumhāre ghar in masarratoñ ke sivā kahāñ haiñ

hamāre gītoñ kī mast tāneñ

hamāre meloñ kī rang-raliyāñ

hamāre tyauhāroñ kī adā.eñ

hamāre fankāroñ kī sadā.eñ

hamāre rastoñ meñ aa ga.ī thiiñ

vo kah rahī thiiñ yahāñ ke zarre bhī is tamaddun ke pāsbāñ haiñ

vo tang galiyoñ meñ zindagī kī haqīqateñ pā-barahna bachche

vo apnī mā'sūm añkhḌiyoñ meñ hayāt kī talḳhiyāñ chhupā.e

ḳhirāj-e-insāf māñgte the

vo apnī mīrās māñgte the

hazār tārīkiyoñ ke dāman meñ paltī ye zindagī kī kaliyāñ

pukārtī thiiñ kisī sahar-āfrīñ mazāq-e-‘amal kī tālib

ye tang-o-tārīk bastiyāñ haiñ ye sab adhūrī kahāniyāñ haiñ

hamīñ ne jamunā ke sāhiloñ ko hasīñ imārāt se sajāyā

hamīñ ne patthar ke saḳht siine ko narm elora kī dhaḌkaneñ diiñ

hamīñ ne rangīniyāñ nichoḌīñ to naqsh ajantā ke ban ga.e the

jo husn-o-josh-e-‘amal samoyā to lāl-qil’e sañvar ga.e the

hamīñ ne marmar kī sard sil ko

amar kiyā taaj kī taḌap dī

yahīñ kī miTTī ne fikr-e-'ġhālib' ko ‘azm-e-'iqbāl' ko nikhārā

diloñ kī 'tagore' kī navāoñ ne baḳhshā vijdān kā sharāra

hamīñ ne 'kālī' kī shā'irī meñ

samoyā shīrāz aur īrāñ kā lahja-e-jazb-o-kaif-o-mastī

hamīñ ne is sarzamīn-e-'gautam' ko she'r kā bāñkpan diyā thā

hamīñ ne tahzīb-e-hind ko ye mizāj-e-gang-o-jaman diyā thā

yahāñ ke afkār-o-‘ilm-o-ā.īñ hamārī 'azmat ke rāz-dāñ haiñ

nahīñ hai apne vatan kī miTTī to kaun apnā nigāh-bāñ hai

nahīñ haiñ gar ye hasīñ fazā.eñ to kaun apnā mizāj-dāñ hai

nahīñ hai gar ye hamārī manzil to phir batāo tumhīñ kahāñ hai

ye kis ke saffāk haath ne toḌ Daalā is ghar kā sāz-e-ulfat

ye kis ne maz.hab kā naam le kar miTā dī me’rāj-e-ādamiyyat

kahāñ haiñ josh-o-vafā-o-himmat

kahāñ hai ajdād kī hamiyyat

haiñ kyoñ luTeroñ meñ maa.eñ bahneñ

ye kaun is ghar ke pāsbāñ haiñ

kahāñ ho chāragaro batāo kahāñ uḳhuvvat ke kārvāñ haiñ

kahāñ ho ai rahbaro dikhāo bujhe bujhe raah ke nishāñ haiñ

ham apne kūchoñ meñ ajnabī haiñ ham apne hī ghar meñ mehmāñ haiñ

ye dil ki rahen udas kyon hain umid ke qafile kahan hain

hum apne kuchon mein ajnabi hain hum apne hi ghar mein mehman hain

yahi hai markaz hamare har KHwab-e-arzu ka

yahi watan hai yahi hai maskan wafa ummid-o-justuju ka

yahi watan hai isi ke kuchon ne KHwab-e-nau dekhne sikhae

isi ke zarron ki chahaton ne

hamare bachpan ki narm-o-nau-KHez KHwahishon ko

jawan ‘azaim ki aanch baKHshi

isi ke sine ki dhaDkanon ne

hamare dil ke ‘amiq goshon ko raushni ki nai kiran di

hum is ki godi ki rahaton ko

yahan se Thukra ke kaise jate

hum is ki mamta ka soz kho kar

sukun-o-aram kaise pate

us ajnabi des ki fazaon mein dil ka aahang kaise milta

un ajnabi wadiyon ke daman mein chah ke phul kaise khilte

ye wardaten ye naqsh-e-ulfat agar kahin hai to bas yahan hain

asaDh ke halke halke baadal

jhaDi wo bhadon ki dopahar ki

wo koyalon ke gudaz naghmon mein ras badalti hui ruton ka

wo nilgun subh ki fazaen

wo dil-nashin sham ke dhundalke

hamare aamon ke bagh banson ke jhunD dariyaon ke kinare

hamare sarson ke khet pipal ki chhanw zarraat ke ishaare

hamara daman pakaD rahe the

yaqin se jholi ko bhar rahe the

wo puchhte the tumhaare ghar in masarraton ke siwa kahan hain

hamare giton ki mast tanen

hamare melon ki rang-raliyan

hamare tyauhaaron ki adaen

hamare fankaron ki sadaen

hamare raston mein aa gai thin

wo kah rahi thin yahan ke zarre bhi is tamaddun ke pasban hain

wo tang galiyon mein zindagi ki haqiqaten pa-barahna bachche

wo apni ma'sum ankhDiyon mein hayat ki talKHiyan chhupae

KHiraj-e-insaf mangte the

wo apni miras mangte the

hazar tarikiyon ke daman mein palti ye zindagi ki kaliyan

pukarti thin kisi sahar-afrin mazaq-e-‘amal ki talib

ye tang-o-tarik bastiyan hain ye sab adhuri kahaniyan hain

hamin ne jamuna ke sahilon ko hasin imaraat se sajaya

hamin ne patthar ke saKHt sine ko narm elora ki dhaDkanen din

hamin ne ranginiyan nichoDin to naqsh ajanta ke ban gae the

jo husn-o-josh-e-‘amal samoya to lal-qil’e sanwar gae the

hamin ne marmar ki sard sil ko

amar kiya taj ki taDap di

yahin ki miTTi ne fikr-e-'ghaalib' ko ‘azm-e-'iqbaal' ko nikhaara

dilon ki 'tagore' ki nawaon ne baKHsha wijdan ka sharara

hamin ne 'kali' ki sha'iri mein

samoya shiraaz aur iran ka lahja-e-jazb-o-kaif-o-masti

hamin ne is sarzamin-e-'gautam' ko she'r ka bankpan diya tha

hamin ne tahzib-e-hind ko ye mizaj-e-gang-o-jaman diya tha

yahan ke afkar-o-‘ilm-o-ain hamari 'azmat ke raaz-dan hain

nahin hai apne watan ki miTTi to kaun apna nigah-ban hai

nahin hain gar ye hasin fazaen to kaun apna mizaj-dan hai

nahin hai gar ye hamari manzil to phir batao tumhin kahan hai

ye kis ke saffak hath ne toD Dala is ghar ka saz-e-ulfat

ye kis ne mazhab ka nam le kar miTa di me’raj-e-adamiyyat

kahan hain josh-o-wafa-o-himmat

kahan hai ajdad ki hamiyyat

hain kyon luTeron mein maen bahnen

ye kaun is ghar ke pasban hain

kahan ho chaaragaro batao kahan uKHuwwat ke karwan hain

kahan ho ai rahbaro dikhao bujhe bujhe rah ke nishan hain

hum apne kuchon mein ajnabi hain hum apne hi ghar mein mehman hain